Ўзбекистон, Тошкент - Batafsil.uz. Ўзбекистон миллий терма жамоаси аъзоси Жалолиддин Машарипов бел қисмидаги жароҳати қайталангани туфайли жамоа қайдномасидан чиқарилиши кутилмоқда. Унинг ўрнини 26 кишилик рўйхатда Русланбек Жиянов эгаллаши мумкин.
Ўзбекистон футбол ассоциацияси (ЎФА) расмий маълумотига кўра, айни пайтда миллий жамоа тиббий штаби футболчининг соғлиғи устида иш олиб бормоқда. Ўтказилган MRT (магнит-резонанс томография) текширувлари натижасида Машариповда умуртқалараро диск чурраси қайта хуруж қилгани аниқланган.
Шу сабабли у терма жамоадаги фаолиятини якунлаши мумкинлиги ҳақида ҳам тахминлар мавжуд. Вазият бўйича якуний тиббий хулоса олингач, қўшимча расмий баёнот берилиши маълум қилинган.
Маълумот ўрнида, сўнгги ҳафталарда футболчининг бел қисмида оғриқлар кузатилган бўлиб, дори-дармон ва физиотерапия муолажаларидан сўнг унинг ҳолати бироз яхшиланган. Бироқ кейинчалик оғриқлар яна безовта қила бошлаган.
Натижада Машарипов АҚШдаги йиғин доирасидаги сўнгги машғулотларни ўтказиб юборган, шунингдек, Канада ва Нидерландия терма жамоаларига қарши ўртоқлик учрашувларида ҳам иштирок эта олмаган.
Эслатиб ўтамиз, футбол бўйича Ўзбекистон терма жамоаси тарихда илк бор жаҳон чемпионатининг финал босқичига йўл олмоқда. Бу ҳақда 5 июнь куни ЖЧ-2026 Осиё саралашининг учинчи босқичи 9-тури доирасида БАА жамоасига қарши кечган ўйинда (0:0) маълум бўлган эди.
Изоҳлар мавжуд емас