Ўзбекистон, Тошкент - Batafsil.uz. АҚШ Ғазначилик вазирлиги мамлакат мустақиллигининг 250 йиллиги муносабати билан Президент Дональд Трампнинг имзоси туширилган янги 100 долларлик банкнотани ҳамда унинг тасвири туширилган эсдалик тангани намойиш этди. Шу тариқа, Дональд Трамп АҚШ тарихида қоғоз пулларда ўз исм-шарифи ва имзосини қолдирган илк президентга айланди.
Олдинроқ АҚШ Молия вазирлиги жорий йилнинг июнь ойидан бошлаб доллар купюраларида президент Дональд Трампнинг имзоси туширилган янги дизайндаги пуллар чоп этилишини маълум қилгани ҳақида хабар берган эдик. Бу Америка мустақиллигининг 250 йиллигига бағишланган тарихий ўзгариш ҳисобланади.
Ғазначилик вазири Скотт Бессентнинг маълум қилишича, президент имзоси жорий йилнинг куз фаслидан бошлаб муомалага чиқариладиган барча номиналдаги янги қоғоз пулларда вазир имзоси билан ёнма-ён жойлашади. АҚШ қонунчилигига кўра, ҳаёт бўлган инсонларнинг суратини муомаладаги қоғоз пул ва тангаларга жойлаштириш тақиқланган бўлса-да, мазкур чеклов махсус эсдалик (муомалага киритилмайдиган) тангаларга тааллуқли эмас.
Шу сабабли, Трампнинг қиёфаси алоҳида чиқариладиган эсдалик доллар тангасида акс эттирилади. Бу АҚШ тарихида биринчи марта кузатилаётгани йўқ — 1926 йилда мамлакатнинг 150 йиллиги муносабати билан ўша вақтда ҳаёт бўлган Президент Калвин Кулидж тасвири туширилган ярим долларлик танга чиқарилган эди.
Вазирлик расмийлари пулларда президент имзосининг пайдо бўлиши солиқ тўловчилар учун қўшимча харажатлар олиб келмаслигини таъкидламоқда. Аксинча, аҳоли ушбу тарихий банкноталарни эсдалик сифатида сақлашга интилиши ҳисобига ғазначилик бюджетига қўшимча фойда келиши кутилмоқда.
Бундан ташқари, Ғазначилик вазирлиги май ойида Трампнинг сурати туширилган 250 долларлик банкнота прототипини ҳам тайёрлаган бўлиб, бироқ бундай номиналдаги пулни расман муомалага чиқариш учун АҚШ Конгрессининг махсус қарори талаб этилади.
Изоҳлар мавжуд емас