Ўзбекистон, Тошкент - Batafsil.uz. АҚШнинг давлат қарзи Иккинчи жаҳон урушидан бери биринчи марта мамлакат иқтисодиёти ҳажмидан ошиб кетди. 31 март ҳолатига кўра, у 31,27 триллион долларга етди, 12 ойлик ЯИМ эса 31,22 триллион долларга баҳоланмоқда.
Fox Business News иқтисодий таҳлил бюроси маълумотларига таяниб ёзишича, ҳукумат ялпи ички маҳсулотнинг 106 фоизини ташкил этувчи тарихий рекордга тез яқинлашмоқда. Бундай кўрсаткич 1946 йилда белгиланган.
Конгресснинг Мустақил бюджет бошқармаси 2030 йилга бориб АҚШ урушдан кейинги рекордни янгилаб, 108 фоизга етишини башорат қилмоқда. 10 йилдан сўнг давлат қарзининг ЯИМдаги улуши 120%ни ташкил этиши мумкин. Қарз иқтисодиётдан тезроқ ўсади.
Масъулиятли федерал бюджет бўйича партиясиз қўмита президенти Майя МакГиннеснинг айтишича, ҳозирги қарзларга Эрон билан уруш эмас, балки партияларнинг қийин қарорлар қабул қилишдан бош тортиши сабаб бўлган. Қарзнинг кўпайиши келажак авлодлар фаровонлигига путур етказади, кредит олиш имкониятини пасайтиради, даромадлар ўсишини секинлаштиради, фоиз ставкаларини оширади ва инфляцияни кучайтиради.
МакГиннес қонун чиқарувчиларни қарзларнинг ўсишини тўхтатишга чақирди. Қарзни барқарорлаштириш учун АҚШ бюджет тақчиллигини тахминан 10 триллион долларга қисқартириши керак. Вариантлардан бири тақчилликни ЯИМнинг 3 фоизигача камайтиришдир. Бу қарзни 100 фоиздан камайтиришга ёрдам беради.
Аввалроқ АҚШ бошқа давлатларга Ҳормуз бўғозида кемалар ҳаракатини тиклаш учун янги иттифоқ тузишни таклиф қилгани маълум бўлган эди. Ташаббус Денгиз эркинлиги коалицияси (Maritime Freedom Construct) деб номланди. Америка давлат департаментининг дипломатик телеграммаси аллақачон АҚШ элчихоналарига юборилган. Дипломатларга хорижий ҳукуматларнинг альянсга қўшилишига эришиш топширилди.
Изоҳлар мавжуд емас