Ўзбекистон, Тошкент - Batafsil.uz. Туркиянинг Анталия вилоятида Алания ҳудудидаги йирик ўрмон ёнғинига қарши кураш давом этмоқда.
Вилоят губернатори Хулуси Шаҳиннинг маълум қилишича, шамолнинг сусайиши ва ўт ўчирувчиларнинг кенг кўламли фаолияти туфайли вазият аста-секин барқарорлашмоқда.
Ёнғин 19 сентябрь куни соат 23:00 атрофида Алиефенди маҳалласида содир бўлган. Олов кучсизлана бошлагач, эрталаб шимоли-шарқий шамолнинг шиддати уни яна алангалатди ва қўшни маҳаллаларга ҳам ўтган. Ёнғин жами учта аҳоли пунктини қамраб олган. Тонг отиши билан ёнғинни ўчиришга авиация воситалари жалб этилган бўлиб, ҳозирда ёнғин фақат бир нуқтада давом этмоқда ва аста-секин кучсизланмоқда.
" Ҳозирги пайтда шамол бироз тўхтади ва шунинг ҳисобига Аланиядаги ёнғиннинг кучайиши пасайди. Агар янги хавфли ҳолат юз бермаса, яқин соатларда яхши хабарларни эълон қилиш имкони бўлади ", - деди губернатор.
Унинг сўзларига кўра, бир суткадан камроқ вақт ичида минтақада 21 та ёнғин содир бўлган - 10 та ўрмон ва 11 та қишлоқ хўжалиги ёнғинлари. Алиефендидаги ёнғиндан ташқари, уларнинг барчаси назоратга олинди, ёнғин ҳамон ўраб олинмоқда.
Гувоҳларнинг сўзларига кўра, шаҳарни қуюқ тутун қоплаган ва сайёҳлар тўғридан-тўғри меҳмонхоналардан олиб кетилган. Хабарларга кўра, камида иккита йирик меҳмонхонада яшовчилар ўз хоналарини тарк этишга мажбур бўлган.
Шаҳиннинг қўшимча қилишича, меҳмонлар биринчи навбатда кучли тутун туфайли эвакуация қилинган ва ҳозирда меҳмонхоналарда яшовчилар йўқ. Ёнғин қайталанмаслиги учун ўт ўчирувчилар дарахтларни совутишда давом этмоқда.
Ёнғинни ўчиришга 639 киши, 2 та самолёт, 10 та вертолёт ва 201 та ер усти техникаси жалб қилинган. Қўшни ҳудудлар ҳам қўллаб-қувватламоқда.
Дастлабки маълумотларга кўра, ёнғиндан 200 гектарга яқин ҳудуд зарар кўрган. Алания ва унинг атрофидаги 57 та уй эвакуация қилинган. Маълум қилинишича, уй-жой ва хўжалик бинолари, шунингдек, битта автомобиль шикастланган.
Ёнғин сабаблари ҳозирча аниқланмаган. Расмийлар бир нечта тахминларни, жумладан, қишлоқ хўжалиги ишлари ва электр узатиш линияларидаги шикастланишларни кўриб чиқмоқда. "Биз барча ҳолатларни жиноий деб ҳисоблаймиз ва терговни охирига етказамиз. Айбдорлар жавобгарликка тортилади", - дея таъкидлади Шаҳин.
Аввалроқ Туркия метеорология бош бошқармаси жазирама, ҳавонинг қуруқлиги ва шамолнинг тезлиги 90 км/соатгача кучайиши туфайли ўрмон ёнғинлари хавфи юқори эканлиги ҳақида огоҳлантирган эди.
Дастлабки версияга кўра, ёнғин фермерлар ўрмон ёнида чиқиндиларни ёқиб юборганидан кейин содир бўлган бўлиши мумкин.
Изоҳлар мавжуд емас