Ўзбекистон, Тошкент - Batafsil.uz. The New York Times нашри журналисти Жон Керрейру ўтказган бир йиллик суриштирув натижаларига кўра, дунёдаги биринчи криптовалюта асосчиси Сатоши Накамото аслида британ криптографи Адам Бэк бўлиши мумкинлиги ҳақида янги далиллар эълон қилинди. Гарчи Адам Бэк бу маълумотларни инкор этиб, барчасини тасодифга йўйган бўлса-да, тўпланган техник ва лингвистик фактлар унинг Биткоин яратилишида бевосита иштирок этганига ишора қилмоқда.
Қайд этилишича, Биткоиннинг техник чизмаси ва унинг асосини ташкил этувчи Hashcash тизими айнан Адам Бэк томонидан ишлаб чиқилган бўлиб, у 90-йилларда ҳукумат назоратидан холи электрон нақд пул ғоясини илгари сурган Cypherpunks гуруҳининг етакчи аъзоларидан бири бўлган. Таҳлиллар шуни кўрсатмоқдаки, Бэк ва Накамото нафақат бир хил дастурлаш тили ва криптография усулларидан фойдаланган, балки уларнинг интернетдаги анонимликка бўлган қарашлари ҳам мутлақо бир хилдир.
Шунингдек, суриштирув давомида вақт билан боғлиқ шубҳали ҳолатлар ҳам аниқланган. Жумладан, 2008 йилда Биткоин эълон қилинган вақтда Адам Бэк интернетдаги барча мунозаралардан ғойиб бўлган, Сатоши Накамото 2011 йилда лойиҳани тарк этганидан сўнг эса Бэк яна фаоллигини тиклаган. Энг қизиқарли далил сифатида икки шахснинг ёзув услубидаги лингвистик ўхшашликлар келтирилмоқда. Махсус компьютер таҳлили Накамотонинг матнларидаги британча имло, гаплар орасидаги иккита бўш жой ва ўзига хос пунктуацион хатолар айнан Адам Бэкнинг ёзув услубига 99 фоиз мос келишини тасдиқлаган. Ҳозирда ушбу суриштирув натижалари крипто-ҳамжамиятда қизғин муҳокамаларга сабаб бўлмоқда.
Эслатиб ўтамиз, ўтган йилнинг июнь ойида биринчи криптовалютанинг қиймати 120 450 долларга етиб, тарихий максимумни янгилаганди.
Изоҳлар мавжуд емас