Ўзбекистон, Тошкент - Batafsil.uz. Буюк Британия Бош вазири Кир Стармер ўзининг ҳукмрон Лейбористлар партияси етакчилигидан истеъфога чиқишини маълум қилди. Бу қарор автоматик равишда унинг мамлакат Бош вазири лавозимини ҳам тарк этишини англатади. Стармер сўнгги ҳафталарда кучли сиёсий босим остида қолаётган эди ва унинг кетиши ҳақидаги якуний қарори партия ичидаги асосий рақиби — Манчестернинг собиқ мэри Энди Бёрнем унга очиқчасига даъвогарлик қилганидан кейин қабул қилинган.
Стармер дастлаб ўз лавозимида қолишга ваъда берган бўлса-да, лейбористлар сафида уни қўллаб-қувватловчилар сони кескин камайиб кетгач, унинг сиёсий мавқеи заифлашган. Айниқса, Энди Бёрнем мэрлик лавозимидан кетиб, ўтган ҳафта бўлиб ўтган сайловларда Парламент аъзолигини қўлга киритгани воқеалар ривожини тезлаштириб юборган (Британия анъаналарига кўра, Бош вазир фақатгина Жамоатлар палатасининг амалдаги аъзолари орасидан сайланиши мумкин).
Бу истеъфо Стармернинг икки йилга ҳам етмаган сершовқин бошқарувига нуқта қўйган. Унинг партияси умуммиллий сайловларда йирик ғалаба билан ҳокимиятга келган бўлса-да, атиги икки ой аввал ўтказилган маҳаллий сайловларда сайловчилар Стармернинг ички сиёсатидан норози эканликларини яққол намойиш этишган.
Лондондаги Бош вазир қароргоҳи қаршисида баёнот берган Кир Стармер ўз чиқишида шундай деган:
"Ҳозирги вақтда партиям менинг келгуси сайловларда етакчилик қилишга лойиқлигим масаласини ўртага қўймоқда. Мен бу саволга берилган жавобни эшитдим ва уни мамнуният билан қабул қиламан. Илгари сурган ҳар бир қароримда доимо мамлакат манфаатини биринчи ўринга қўйганман. Мен Лейбористлар партияси етакчилигидан истеъфога чиқаман".
Баёнотининг якунида Кир Стармер ўзининг фарзандлари ҳақида гапирар экан, уларни ўзининг "фахри ва қувончи" деб атаган ва ҳаяжондан кўзларига ёш олган.
Изоҳлар мавжуд емас