Ўзбекистон, Тошкент - Batafsil.uz. АҚШ Президенти Дональд Трамп 19 май куни Эронга берилиши керак бўлган ҳарбий зарбаларни вақтинчалик тўхтатиб туриш ҳақида буйруқ берганини маълум қилди. Трамп ўзининг Truth Social ижтимоий тармоғидаги саҳифасида ушбу қарор Яқин Шарқдаги асосий ҳамкорлар илтимосига кўра қабул қилинганини ёзиб қолдирди.
АҚШ раҳбарининг таъкидлашича, Қатар, Саудия Арабистони ва Бирлашган Араб Амирликлари раҳбарлари унга мурожаат қилиб, ҳозирда Теҳрон билан жиддий музокаралар олиб борилаётганини билдиришган. Араб етакчилари ушбу сиёсий мулоқотлар яқин кунларда ҳам Вашингтон, ҳам Яқин Шарқ минтақаси учун мақбул бўлган тинчлик келишуви билан якунланиши мумкинлигига ишонч билдирган.
"Мен ушбу олий даражадаги етакчиларга бўлган ҳурматимдан келиб чиқиб, Мудофаа вазири Пит Хегсетга, Қуролли кучлар штаб бошлиқлари қўмитаси раиси генерал Дэн Кейнга ҳамда АҚШ ҳарбийларига режалаштирилган ҳужумни тўхтатиб туриш бўйика кўрсатма бердим", — деб ёзади Трамп. Шу билан бирга, у агар музокаралар муваффақиятсиз якунланса, АҚШ армияси Эронга қарши кенг қамровли ҳарбий ҳаракатларни бошлашга тўлиқ шай ҳолатда эканини қатъий эслатиб ўтган. Вашингтоннинг асосий талаби — Эроннинг ядровий қурол яратиш амбицияларидан бутунлай воз кечиши ҳисобланади.
Эслатиб ўтамиз, АҚШ ва Эрон ўртасида жорий йилнинг апрель ойи бошида вақтинчалик сулҳга эришилган эди. Ўшанда Оқ уй Теҳронга воситачи давлатлар орқали 14 банддан иборат шартнома лойиҳасини тақдим этган. Унга кўра, Эрон ядровий дастурини тўхтатиши эвазига АҚШ иқтисодий санкцияларни босқичма-босқич юмшатишга ваъда берган.
Бироқ Эрон томони бунга жавобан музокара столига қайтиш учун ўз томонидан 5 та банддан иборат шартларни илгари сурган. Президент Трамп Эроннинг ушбу талабларини АҚШ учун "мутлақо қабул қилиб бўлмас" деб атаган ва бунинг ортидан минтақада ҳарбий тўқнашув хавфи кескин ортиб кетган. Араб димпломатиясининг аралашуви ҳозирча вазиятни қуролли тўқнашув даражасигача етиб боришини вақтинчалик ушлаб турибди.
Изоҳлар мавжуд емас