Ўзбекистон, Тошкент - Batafsil.uz. Испания жанубидаги Эль-Эхидо (Альмерия яқинида) шаҳарчасида мудҳиш отишма содир бўлди. Натижада 25 ёшли йигит ўз ота-онасини ўқотар қуролдан отиб ўлдирганликда ва яна тўрт кишини жароҳатлаганликда гумонланиб ҳибсга олинди.
Маҳаллий ҳукумат органларининг маълум қилишича, қуролли ҳужум ҳақидаги хабар маҳаллий вақт билан соат 23:00 атрофида келиб тушган. Отишма оқибатида жароҳатланган тўрт нафар шахс, жумладан, икки нафар ёш бола оғир аҳволда шифохонага ётқизилган.
Маҳаллий ОАВнинг хабар беришича, жабрланган болаларнинг бири жиноят содир этишда гумонланаётган шахснинг 7 ойлик ўз фарзанди (ўғли), иккинчиси эса 18 ойлик гўдакдир. Шунингдек, ярадорлар орасида 60 ёшли эркак ҳам борлиги айтилмоқда. Ҳозирча Испания расмий идоралари гумонланувчи ва қурбонларнинг шахсини очиқламаган.
Europa Press агентлигининг ёзишича, қотил жиноятни содир этгандан сўнг бир муддат яшириниб юрган, бироқ кейинчалик ўзи маҳаллий полиция маҳкамасига келиб таслим бўлган. Ҳозирда Испания Фуқаролик гвардияси мазкур қонли ҳужум юзасидан тергов ҳаракатларини олиб бормоқда ва отишманинг асл сабабларини аниқлашга ҳаракат қилмоқда.
Қайд этиш лозимки, Испанияда бу каби оммавий отишмалар жуда кам кузатилади. Европадаги қуролли жиноятларни кузатиб борувчи Project Insight ташкилоти маълумотларига кўра, 2000 йилдан 2023 йилгача бўлган даврда мамлакатда бор-йўғи тўртта шундай ҳолат рўйхатга олинган.
Бундан олдин Фарғона шаҳрида Янги йил оқшомида содир этилган мудҳиш қотиллик юзасидан ҳам суд ҳукми ўқилганди. Муқаддам ўз турмуш ўртоғини ўлдиргани учун узоқ муддатли қамоқ жазосини ўтаб чиққан 59 ёшли шахс бу гал ўз онасининг қотилига айланган эди.
Изоҳлар мавжуд емас