Дунёда янги хавф: Сунъий интеллект биринчи марта бир давлат инфратузилмасига мустақил ҳужум қилди

Ўзбекистон, Тошкент - Batafsil.uz. ​ Тайвань давлат идораларига қарши июль ойида амалга оширилган киберҳужумда сунъий интеллект агентлари хакерларнинг бевосита аралашувисиз разведка, аккаунтларни бузиш ва кейинги ҳужум йўналишларини белгилаш каби вазифаларни бажарган. Мутахассислар бу ҳолатни давлат ташкилотларига қарши тўлиқ автоном киберҳужумнинг илк маълум бўлган мисоли деб баҳоламоқда.

Ҳужум тўрт кун давом этган. Исроилнинг Dream AI компанияси аниқлаган маълумотларга кўра, сунъий интеллект агентлари 21 та давлат тизимини хариталаш, 85 та давлат аккаунтини бузиш ва 2500 нафар ходимга оид маълумотларни олишга муваффақ бўлган.

Тайвань Рақамли ишлар вазирлиги ҳужумлар хориждан амалга оширилганини ва уларда анъанавий хакерлик усуллари ҳамда OpenClaw каби сунъий интеллект агентлари биргаликда қўлланганини маълум қилган. Ҳужум манбаси расман тасдиқланмаган бўлса-да, экспертлар Хитой билан боғлиқлик эҳтимоли юқори эканини билдирган. AI агентлари хакер ўрнида ҳаракат қилган

Оддий ҳолатда сунъий интеллект хакерга код ёзиш, заифликларни топиш ёки маълумот излашда ёрдамчи восита сифатида ишлатилади. Бу ҳодисада эса технология анча юқори даражада қўлланган.

Ҳужумда бир вақтнинг ўзида саккизтагача AI агенти ишлаган. Улар тизимларга киришга уриниш, ҳимоя чораларини четлаб ўтиш, кейинги мақсадларни танлаш ва ҳужум стратегиясини ўзгартириш каби вазифаларни мустақил бажарган.

Dream компанияси вакили Амир Беккернинг таъкидлашича, тизим ҳужумнинг бир усули блокланганида янги ёндашувларни излаб, кейинги ҳаракатларини мустақил равишда мослаштирган.

Тайвань расмийларига кўра, AI агентлари турли хакерлик усулларини тезда бирлаштириб, иккинчи даражали тизимлардаги заифликлардан фойдаланган. Бу ҳужумларни тезроқ, арзонроқ ва катта миқёсда амалга ошириш имконини берган.

Ҳужум фақат давлат идоралари билан чекланмаган. Тайвань ядровий хавфсизлик агентлиги, давлат ташкилотларига IT хизмат кўрсатувчи компаниялар ва энергетика соҳасидаги камида еттита компания ҳам ҳужумларга дучор бўлган.

Ҳужумга боғлиқ ички ҳужжатларда Хитойда қўлланадиган соддалаштирилган хитой ёзуви аниқланган. Шу сабабли айрим экспертлар ҳужум ортида Хитой билан боғлиқ давлат ёки нодавлат субъект турган бўлиши мумкинлигини тахмин қилмоқда. Хитой Ташқи ишлар вазирлиги эса бу ҳолатдан хабарсиз эканини билдирган.

Тайвань Network Information Center раҳбари Кенни Хуангнинг фикрича, мазкур воқеа сунъий интеллектнинг киберхавфсизликда энди фақат инсон хакерларига ёрдам берувчи восита эмас, балки мустақил ҳужум иштирокчисига айланаётганини кўрсатади.

Асосий хавф шундаки, AI агентлари ҳужумларни автоматлаштириб, бир вақтнинг ўзида кўпроқ объектларни нишонга олиши мумкин. Бу эса киберҳужумларни ташкил этиш харажатини кескин камайтиради.

Хуангнинг таъкидлашича, давлатлар бундай ҳужумларга қарши ҳуқуқий механизмлар, техник имкониятлар ва ҳимоя стратегияларини ишлаб чиқишда ҳали етарлича тайёр эмас. Унинг фикрича, бу муаммо нафақат Тайвань, балки барча давлатлар учун долзарб.