Ўзбекистон, Тошкент - Batafsil.uz. Америкалик тадбиркор Илон Маск ўзининг аэрокосмик, сунъий йўлдош ва сунъий интеллект технологиялари билан шуғулланувчи SpaceX компаниясини фонд бозорига олиб чиққанидан сўнг, расман дунё тарихидаги илк триллионерга айланди. Forбes нашрларининг компания ҳужжатларига асосланган қўшма ҳисоб-китобларига кўра, жорий йилнинг 12 июнь, жума куни акциялар савдоси бошланиши билан Маскнинг умумий бойлиги 1,1 триллион доллардан ошиб кетган. Бу кўрсаткич дунёдаги иккинчи энг бой одам — Alphabet асосчиларидан бири Ларри Пейжнинг бойлигидан уч баравар кўп демакдир.
Маскнинг молиявий империясидаги ушбу тарихий сакраш пайшанба куни ўтказилган SpaceX компаниясининг бирламчи оммавий жойлаштируви (IPO) туфайли юз берган. Мазкур жараёнда компания рекорд даражадаги 75 миллиард доллар маблағ йиғишга муваффақ бўлди ва бу фонд бозори тарихидаги энг йирик кўрсаткич сифатида қайд этилган. Ушбу акциялар савдосига қадар Forбes Маскнинг бойлигини 780 миллиард долларга баҳолаган эди.
Айни пайтда тадбиркорнинг SpaceX компаниясидаги улушининг ўзигина қарийб 866 миллиард долларни ташкил этмоқда, қолган қисми эса Tesla ва бошқа активлари ҳисобига тўғри келади. Инвесторлар компаниянинг узоқ муддатли лойиҳаларига катта ишонч билдирмоқда ва бозорда юзага келган бундай юқори қиймат мутахассислар томонидан "Илон премиуми" (Elon premium) деб аталмоқда.
Шу билан бирга, Маскнинг сиёсий ва ижтимоий ҳаётдаги фаоллиги турли муҳокамаларга сабаб бўлмоқда. У 2022 йилда Twitter ижтимоий тармоғини 44 миллиард долларга сотиб олиб, сиёсат, иммиграция ва давлат харажатлари каби мавзуларда ўз фикрларини фаол ифода эта бошлаган. Айниқса, унинг АҚШ Президенти Дональд Трамп маъмурияти қошидаги Давлат самарадорлиги департаментидаги (DOGE) фаолияти энг баҳсли қадамлардан бири бўлган.
Сиёсий жараёнларга аралашув ортидан 2025 йилда бир қатор халқаро бозорларда Tesla электромобиллари савдоси сустлашгани ва истеъмолчилар томонидан бойкотлар уюштирилгани кузатилган. Трамп билан муносабатларида ҳам бюджет ва сиёсий йўналишлар бўйича келишмовчиликлар сабабли маълум муддат совуқчилик юзага келган бўлса-да, кейинчалик томонлар яна муросага келишган.
Бизнес олами ва Уолл-стрит вакиллари эса Маскнинг зиддиятли характерига қарамай, унинг инновацион қобилиятини юқори баҳоламоқда. Илгари Маск билан узоқ вақт давомида судлашиб келган JPMorgan Chase банки бош ижрочи директори Жейми Даймон яқинда бўлиб ўтган суҳбатда уни "бизнинг давримизнинг Эдисони ва Эйнштейни" деб атаган.
Хусусан, Илон Маск Ойда биринчи шаҳар қурилиши ўн йилдан камроқ вақт ичида ҳақиқатга айланиши мумкинлигини айтганди. Унинг сўзларига кўра, айни пайтда Ой йўналиши устувор йўналиш сифатида кўрилмоқда.
Изоҳлар мавжуд емас