Ўзбекистон, Тошкент - Batafsil.uz. АҚШ президенти Дональд Трамп Исроил бош вазири Биньямин Нетаньяхуга Эрон билан тинчлик келишуви яқин кунларда имзоланиши мумкинлигини маълум қилди.
Маълумотларга кўра, Трамп телефон орқали мулоқотда Нетаньяхуга бу келишув урушни якунлаш учун энг мақбул ечим эканини айтган.
Таҳлилчиларнинг фикрича, Исроил раҳбарияти Эронга қарши ҳарбий ҳаракатлар бошланганида воқеаларнинг бошқача якунланишини кутган эди. Нетаньяху Эронга босимни кучайтириш орқали мамлакат ичида сиёсий ўзгаришларга эришиш мумкин деб ҳисоблаган.
Хабарларга кўра, ҳафта бошида Исроил Эроннинг энергетика ва инфратузилма объектларига кенг кўламли зарбалар беришни режалаштирган. Бироқ АҚШ раҳбарияти бу режани қўллаб-қувватламаган.
Шундан кейин Исроил томони Вашингтонда олиб борилаётган музокаралар ҳақида қўшимча маълумот олишга ҳаракат қилган. Трампнинг Эрон билан келишув бўйича эълони эса Исроил раҳбарияти учун кутилмаган ҳолат бўлган.
Манбаларнинг таъкидлашича, Нетаньяху Трамп билан суҳбат давомида кескин қаршилик билдирмаган. У якуний келишув Эроннинг ядровий дастури билан боғлиқ хавотирларни ҳисобга олишига ишонч билдирган.
Шу билан бирга, Исроил расмий доираларида эҳтимолий келишувга нисбатан шубҳалар сақланиб қолмоқда. Улар Эрон иқтисодий чекловлар юмшатилганидан кейин вақт ютиб, ядровий дастури бўйича ҳақиқий ён беришларга бормаслигидан хавотирда.
Исроил мудофаа вазири Исроил мамлакат хавфсизлигини таъминлаш учун мустақил ҳаракат қилиш ҳуқуқини сақлаб қолишини билдирган.
Мутахассислар фикрича, агар уруш Исроил раҳбарияти белгилаган асосий мақсадларга тўлиқ эришилмасдан якунланса, бу Нетаньяху учун ҳам сиёсий, ҳам стратегик жиҳатдан жиддий муаммолар келтириб чиқариши мумкин.
Аввалроқ АҚШ Президенти Дональд Трамп Исроил Бош вазири Биньямин Нетаньяҳу билан телефон мулоқоти чоғида Ливандаги ҳарбий ҳаракатлар кескинлашуви юзасидан норозилик билдирганди. Axios нашрининг ёзишича, суҳбат давомида Трамп Исроилнинг режалаштирилган айрим ҳаракатларини қаттиқ танқид қилган эди.
Изоҳлар мавжуд емас