Ўзбекистон, Тошкент - Batafsil.uz. Қирғизистонда собиқ президент Алмазбек Атамбоевнинг ўғли Қодирбек Атамбоев ҳибсга олинди. Бир неча собиқ депутатлар ҳам ушланган. Тергов версиясига кўра, улар парламент сайловларидан кейин мамлакат бўйлаб бир қатор митинглар ўтказишни режалаштирган.
Қўлга олинганлар орасида сиёсатчи Темирлан Султонбеков, собиқ депутатлар Шойлообек Атазов ва Кубаничбек Қодиров, Алмазбек Атамбоевнинг собиқ тансоқчиси Дамир Мусакеев, "Социал-демократлар" партияси етакчиси Эрмек Эрматов, шунингдек, тадбиркор Урмат Бариктабасов (Асқарбеков) бор.
Қўшни республика Ички ишлар вазирлиги уларга оммавий тартибсизликларни уюштиришга тайёргарлик кўриш айблови қўйилганини маълум қилди. Тинтув чоғида қурол-яроғ, ўқ-дорилар, гранаталар, алоқа воситалари, молиялаштириш ҳужжатлари, ҳаракатлар режалари, гиёҳванд моддалар, шунингдек, 150 минг доллар мусодара қилинган.
"Уларнинг режаларида конституцияга қарши чақириқлар, шунингдек, маъмурий бинолар, телеканаллар, куч тузилмалари объектлари, қурол-яроғ ва жазони ижро этиш муассасалари эгаллаб олиниши мумкин эди," - дейилади хабарда.
Мамлакат собиқ президентининг ўғли Қодирбек Атамбоев унга қарши иш оғирроқ моддага қайта малакаланганини маълум қилди - унга ҳокимиятни зўравонлик билан ағдаришга уриниш айблови қўйилган.
Эслатиб ўтамизки, Алмазбек Атамбоев 2011-2017 йилларда Қирғизистон президенти лавозимида ишлаган. 2019 йилда Қўй-Тош қишлоғидаги қароргоҳига ҳужум уюштирилгандан сўнг, у ҳибсга олинган ва ерларни ноқонуний ўзлаштириш, коррупция ва оммавий тартибсизликларни уюштиришда айбланган.
2020 йилда Атамбоев мол-мулки мусодара қилинган ҳолда 11 йил-у икки ойга озодликдан маҳрум этилганди. Бироқ 2023 йилда суд уни хорижда даволаниш учун қўйиб юборган - у Испанияга кетган ва ўшандан бери Қирғизистонга қайтмаган.
Изоҳлар мавжуд емас