Ўзбекистон, Тошкент - Batafsil.uz. АҚШ Президенти Дональд Трамп томонидан таклиф этилаётган Эрон билан сулҳ битими Исроил сиёсий доираларида кескин норозилик ва ички инқирозни келтириб чиқарди. Исроил ҳукумати аъзолари ва мухолифат етакчилари ушбу келишувни "стратегик мағлубият" деб атаб, Бош вазир Беньямин Нетаньяхуни мамлакат хавфсизлигини таъминлай олмаганликда айбламоқда.
Миллий хавфсизлик вазири Итамар Бен-Гвир Исроил ушбу битимга шерик эмаслигини ва у АҚШга бўйсунмайдиган мустақил давлат эканини маълум қилган. У Ҳизбуллоҳ бутунлай тугатилмагунча ва армия эгаллаган ҳудудлардан чиқиб кетмагунча ҳеч қандай ён беришларга рози бўлмаслигини қатъий таъкидлаган.
Шунингдек, Молия вазири Бецалель Смотрич ҳам ушбу битимни Исроил ва бутун эркин дунё учун "ёмон келишув" деб атаб, Теҳроннинг ядровий қуролга эга бўлишига йўл қўймаслик учун Исроил урушни мустақил равишда давом эттиришига тўғри келишини шаъма қилган. Мудофаа вазири Исраэль Кац эса Исроил армияси Ғазо, Сурия ва Ливандаги хавфсизлик ҳудудларида номаълум муддатга қолишини билдирган.
Мухолифат вакиллари эса вазиятдан Нетаньяху ҳукуматини ағдариш учун фойдаланмоқда. Демократлар партияси етакчиси Яир Голан ушбу келишувни Теҳронга миллиардлаб доллар олиб келадиган ва Исроил учувчилари ҳамда аскарларининг қони эвазига эришилган ютуқларни йўққа чиқарадиган ҳужжат сифатида баҳолаб, Нетаньяхуни алмаштиришни "яшовчанлик зарурати" деб атаган.
"Кўк ва оқ" партияси раҳбари Бенни Ганц Исроилнинг Ливандаги ҳаракат эркинлиги чекланишига асло йўл қўйиб бўлмаслигини айтган бўлса, собиқ Бош штаб бошлиғи Гади Айзенкот ҳукумат ваъда қилган "мутлақ ғалаба" ва бугунги аянчли воқелик ўртасида катта жарлик пайдо бўлганини таъкидлаган.
Фақатгина Кнессет аъзоси Мики Зохар Трамп ва Нетаньяху ўртасидаги алоқалар мустаҳкамлигича қолишини ва тез орада кутилмаган янгиликлар бўлишини айтиб, ҳукуматни ҳимоя қилган.
Эслатиб ўтамиз, АҚШ президенти Дональд Трамп АҚШ ва Эрон ўртасидаги келишув жума куни имзоланишини маълум қилганди. Бу баёнот 100 кундан ортиқ давом этган қуролли тўқнашувлардан кейин янграган. Эрон расмийлари ҳам ҳарбий ҳаракатларни тўхтатиш режалари мавжудлигини тасдиқлаб, урушни якунлаш бўйича келишувга яқин қолинганини билдирган эди.
Изоҳлар мавжуд емас