Ўзбекистон, Тошкент - Batafsil.uz. АҚШ Президенти Дональд Трамп Пекин ташрифидан сўнг Вашингтонга қайтиб келди ва тинчлик музокаралари боши берк кўчага кириб қолгани сабабли Эронга қарши янги ҳарбий амалиётларни бошлаш танлови қаршисида турибди.
Пентагон раҳбарияти Эрон билан тинчлик битими тузилмаган тақдирда ҳарбий ҳаракатларни кенгайтириш бўйича жанговар режаларни тайёрлаб қўйган. Мудофаа вазири Пит Хегсет Конгрессдаги чиқишида вазият тақозо этса, Пентагоннинг "ҳужумни кучайтириш режаси" мавжудлигини тасдиқлаган. Эрон парламенти спикери Муҳаммад Бағир Ғалибаф эса ўз баёнотида мамлакат қуролли кучлари ҳар қандай тажовузга муносиб жавоб қайтаришга ва барча сценарийларга тайёр эканини маълум қилган.
АҚШ ҳарбий ҳаракатлар қайта бошланса, Эроннинг кўприклари ва электр станциялари каби муҳим объектларини тизимли равишда вайрон қилиш билан таҳдид қилмоқда. Бу орқали Теҳрон Ҳўрмуз бўғозини халқаро кемалар учун очишга мажбурланмоқда.
Режалардан бири Исфаҳондаги ядровий объектда сақланаётган юқори даражада бойитилган уранни йўқ қилиш учун махсус топшириқли кучларни ер усти амалиётига жалб қилишни кўзда тутади, бу эса катта талофатлар хавфини туғдиради. Яқин Шарқ минтақасида 50 мингдан ортиқ АҚШ аскари, иккита авиаташувчи кема ва ўнлаб қирувчи самолётлар жанговар шай ҳолатда турибди.
Трамп Пекиндан қайтаётиб, Эрон томонининг охирги тинчлик таклифини рад этганини ва Хитой раҳбари Си Цзиньпин билан Эрон масаласини муҳокама қилганини билдирган. АҚШ ва Исроил разведка хизматлари келаси ҳафтадаёқ Эронга қарши ҳужумларни қайта бошлаш учун жиддий тайёргарлик кўрмоқда, чунки 7 апрелда эришилган сулҳ даврида Эрон ўз ракета мажмуаларини қайта тиклашга улгурган.
Эслатиб ўтамиз, кеча Эрон Ташқи ишлар вазири Аббос Арағчи Ҳурмуз бўғозига кираётган барча кемалар Эрон ҳарбий-денгиз кучлари билан ҳамкорлик қилиши шартлигини маълум қилганди. Ҳиндистонда ўтаётган БРИКС давлатлари йиғилишида сўзга чиққан Аббос Арағчи Ҳўрмуз бўғози тижорат кемалари учун очиқлигини, бироқ янги хавфсизлик қоидаларига риоя этилиши шартлигини таъкидлаган эди.
Изоҳлар мавжуд емас