Ўзбекистон, Тошкент - Batafsil.uz. Эрон Ташқи ишлар вазири Аббос Арағчи Ҳурмуз бўғозига кираётган барча кемалар Эрон ҳарбий-денгиз кучлари билан ҳамкорлик қилиши шартлигини маълум қилди. Ҳиндистонда ўтаётган БРИКС давлатлари йиғилишида сўзга чиққан Аббос Арағчи Ҳурмуз бўғози тижорат кемалари учун очиқлигини, бироқ янги хавфсизлик қоидаларига риоя этилиши шартлигини таъкидлади.
Ушбу баёнот Бирлашган Араб Амирликларининг (БАА) Фужайра порти яқинида номаълум шахслар томонидан кема қўлга олиниб, Эрон сувлари томон олиб кетилгани ҳақидаги хабарлар фонида янграган. Вазирнинг сўзларига кўра, минтақадаги беқарорлик учун жавобгарлик Эрон портларига нисбатан "аксилблокада" жорий этган АҚШ зиммасидадир.
Дунё нефть ва газ етказиб беришнинг тўртдан бир қисми ўтадиган Ҳўрмуз бўғози АҚШ-Исроил ҳарбий амалиётлари бошлангандан бери Эрон томонидан амалда ёпиб қўйилган. Ҳозирда минглаб кемалар денгизда қолиб кетмоқда.
Эрон Хитой билан махсус келишувга эришганини ва бунинг натижасида Хитойга тегишли нефть танкерлари бўғоздан ўтишни бошлаганини маълум қилган. Хабарларга кўра, Хитой ҳар бир баррель нефть учун тахминан 1 доллар миқдорида тўлов тўлашга рози бўлган.
БМТ Хавфсизлик кенгашида АҚШ ва Баҳрайн томонидан Эрон блокадасини қораловчи янги резолюция лойиҳаси муҳокама қилинмоқда. Аввалги лойиҳа 7 апрель куни Россия ва Хитой томонидан вето қўйилгани сабабли қабул қилинмаган эди.
Янги резолюция лойиҳасида Эрондан кемаларга ҳужумларни тўхтатиш, миналарни олиб ташлаш ва Ҳўрмуз бўғози орқали ўтиш учун тўловлар жорий этишдан воз кечиш талаб қилинмоқда. Ўз навбатида, Эрон томони Ғарб давлатларининг Исроил ва АҚШ томонидан халқаро ҳуқуқ бузилишига сукут сақлаётганини танқид қилиб, Эрон босимлар остида янада жипслашишини билдирган. БАА ва бошқа Форс кўрфази давлатлари ҳам Эронни халқаро навигация эркинлигини чекламасликка чақириб, БМТга қўшма хат йўллаганлар.
Бундан олдин БМТ Хавфсизлик кенгаши Яқин Шарқдаги вазият бўйича янги резолюцияни тасдиқлаганди. Ҳужжатда Эроннинг минтақа давлатларига уюштирган ҳужумлари кескин қораланган, бироқ Исроил ва АҚШ ҳаракатлари тилга олинмаган эди.
Бўғоздаги вазиятни тартибга солиш бўйича Уммон давлати БМТ билан алоҳида музокаралар олиб бормоқда ва денгиз хизматлари учун ҳақ тўлашни кўзда тутувчи янги маъмурий режимни таклиф қилмоқда.
Изоҳлар мавжуд емас