Ўзбекистон, Тошкент - Batafsil.uz. Қозоғистон Ички ишлар вазирлиги жамоат жойларида юзни тўлиқ беркитадиган кийимларни кийиш тақиқланганидан сўнг амалга оширилган назорат тадбирлари натижаларини эълон қилди. Расмий маълумотларга кўра, ушбу қонун талабларини бузган 1179 нафар фуқаро маъмурий жавобгарликка тортилган.
Мазкур тақиқ 2025 йил 30 июнь куни Президент Қосим-Жомарт Тўқаев томонидан имзоланган қонунга асосланади. Унга кўра, жамоат жойларида ниқоб, паранжи ва шахсни аниқлашга тўсқинлик қилувчи бошқа кийимларни кийиш мумкин эмас. Қоидабузарлик такроран содир этилганда, фуқароларга тахминан 39 320 тенге миқдорида жарима солиш кўзда тутилган.
Қозоғистон расмийлари ушбу чекловларни жамоат хавфсизлигини таъминлаш ҳамда ниқоб ва паранжининг миллий тарихий анъаналарга номувофиқлиги билан изоҳламоқда. Қозоғистон мусулмонлари идораси ҳам ушбу қонунчилик ташаббусини қўллаб-қувватлаган.
Шу тариқа Қозоғистон Марказий Осиё давлатлари орасида жамоат жойларида юзни тўсиб турувчи кийимларни қонунан тақиқлаган сўнгги мамлакатга айланди. Аввалроқ Ўзбекистон, Қирғизистон ва Тожикистонда ҳам шунга ўхшаш чоралар қабул қилинган бўлиб, у ерда ушбу кийим турлари "миллий маданиятга ёт" деб эълон қилинган эди.
Изоҳлар мавжуд емас