Ўзбекистон, Тошкент - Batafsil.uz. АҚШ Мудофаа вазирлиги (Пентагон) Президент Дональд Трамп Эронга қарши ҳарбий ҳаракатларни қайта бошлаш ҳақида буйруқ берган тақдирда зарба бериладиган ҳарбий нишонлар рўйхатини ва бир қатор режаларни шакллантирди.
Бу ҳақда "CNN" телеканали ўз манбаларига таяниб хабар бермоқда.
Ҳарбий режаларда Эроннинг энергетика объектлари ҳамда муҳим инфратузилма элементларига зарба бериш кўзда тутилган. Маълумотларга кўра, Дональд Трамп Хитойга қилган ташрифидан қайтиб келгач, якшанба куни Виржиния штатидаги гольф-клубида ўз маъмуриятининг юқори мартабали аъзолари билан Теҳронга нисбатан ташланадиган кейинги қадамларни муҳокама қилган. Ушбу учрашувда Вице-президент Жей Ди Вэнс, Марказий разветка бўлими директори Жон Рэтклифф ва махсус вакил Стив Уиткофф иштирок этган.
Музокараларнинг батафсил тафсилотлари очиқланмаган бўлса-да, Трампнинг Эрон томонидан Ҳўрмуз бўғози тўсиб қўйилгани ҳамда бунинг оқибатида жаҳон бозорида нефть нархи кўтарилиб бораётганидан қаттиқ норози экани айтилмоқда. Оқ уй раҳбари Эронни АҚШ билан келишувга шошилишга чақириб, вақт ғанимат эканини таъкидлаган. Ҳафта бошида АҚШ етакчиси миллий хавфсизлик бўйича ўз жамоаси билан ушбу масалада яна бир бор учрашиши кутилмоқда.
Апрель ойи охирида АҚШ Теҳрон билан вазиятни тартибга солиш бўйича мулоқот якунлангунга қадар ўт очишни тўхтатиш режимини бир томонлама узайтирган эди. Бироқ томонлар ўртасида ўтказилган музокаралар ҳеч қандай натижа бермаган. Шундан сўнг АҚШ Эрон портларини блоклашга уринди, Эрон Ислом Республикаси эса бунга жавобан Ҳўрмуз бўғозини ёпиб қўйди ва Вашингтон билан ҳар қандай янги алоқаларни рад этди.
Изоҳлар мавжуд емас