Ўзбекистон, Тошкент - Batafsil.uz. Пекинда Жанубий Корея Президенти Ли Чже Мён ва Хитой етакчиси Си Цзиньпин ўртасидаги учрашув нафақат сиёсий баёнотлари, балки кутилмаган "селфи" билан ҳам тарихга кирди. 2019 йилдан бери илк бор ўтказилган ушбу олий даражадаги ташриф икки давлат ўртасидаги совуқлашган алоқаларни "қайта юклаш" вазифасини ўтамоқда.
Учрашувнинг энг шов-шувли лаҳзаси — Ли Чже Мённинг Си Цзиньпин билан тушган селфиси бўлган. Қизиғи шундаки, Корея раҳбари суратга тушиш учун ўзи ўтган йили Си Цзиньпинга совға қилган "Xiaomi" смартфонидан фойдаланган ва суратни ижтимоий тармоққа жойлаб: "Тасвир сифати жуда зўр, шундай эмасми?" — дея изоҳ қолдирган. Бу харакат Хитой томонига нисбатан юқори ҳурмат ва яқинлик белгиси сифатида баҳоланмоқда.
Музокаралар марказида фақат сиёсат эмас, балки миллионлаб мухлислар кутаётган маданий масалалар ҳам бор эди.
Ли Хитойда қарийб 10 йилдан бери амалда бўлган корейс сериаллари ва мусиқасига қўйилган норасмий тақиқни бекор қилишни сўраган.
Томонлар маданий алмашинувларни босқичма-босқич тиклашга келишиб олганлар.
Си Цзиньпин кореялик ҳамкасбини "тарихнинг тўғри томонида туришга" чақирар экан, бу билан АҚШ ва Япониянинг минтақадаги таъсирига ишора қилган. Айниқса, АҚШ томонидан Венесуэла президенти Николас Мадуронинг қўлга олиниши фонида, Хитой Жанубий Кореяни ўз томонига кўпроқ оғдиришга ҳаракат қилмоқда.
Ташриф арафасида Пхенян навбатдаги баллистик ракеталарини синовдан ўтказгани музокаралар кун тартибини янада жиддийлаштирган. Ли Чже Мён Корея ярим оролида тинчлик ўрнатиш учун Пекиннинг таъсиридан фойдаланишга интилмоқда. Президентнинг фикрича, бу борада Хитой билан "амалий муқобил йўллар"ни топиш вақти келган.
Ли Чже Мён Пекиндаги тўрт кунлик марафондан сўнг тўғридан-тўғри Японияга йўл олади. У ерда Бош вазир Санаэ Такаити билан учрашиб, минтақавий хавфсизликнинг яна бир муҳим бўғинини муҳокама қилиши режалаштирилган.
Эслатиб ўтамиз, Такаити — марҳум бош вазир Синзо Абэнинг шагирди бўлиб, сиёсий қарашларини қўллаб-қувватлайдиган қатъий консерватор сифатида танилган. Унинг хавфсизлик ва ташқи сиёсатдаги позицияси Хитой ҳамда Жанубий Корея билан муносабатларда тортишувларга сабаб бўлиши мумкин.
Изоҳлар мавжуд емас