Ўзбекистон, Тошкент - Batafsil.uz. Совет ва рус психотерапевти Анатолий Кашпировский 3 октябрь куни 87 ёшида юрак тўхташи оқибатида дунёдан ўтди.
Маълумотларга кўра, унинг соғлиғи кескин ёмонлашиб, қон босими тушиб кетгани сабабли шифохонага ётқизилган эди.
Анатолий Кашпировский 1939 йил 11 августда Ставница қишлоғида туғилган. У 1962 йилда Винница тиббиёт институтини тамомлаб, 1963–1988 йилларда Винница вилоят психоневрология шифохонасида психиатр ва психотерапевт сифатида фаолият юритган.
Фаолияти давомида гипноз ҳамда руҳий таъсир ўтказиш усулларини қўллаган.
1980-йилларнинг иккинчи ярмида у "диққатни жамлаш" усули орқали оммавий "соғломлаштириш" сеансларини ўтказа бошлаган.
1988 йил баҳорида "Киев — Москва" телекўпригида иштирок этиб, оператив жарроҳлик амалиёти пайтида масофадан "оғриқсизлантириш" сеансини намойиш этган.
Кашпировский 1989–1990 йилларда Марказий телевидение орқали узатилган "Шифокор-психотерапевт Анатолий Кашпировскийнинг саломатлик сеанси" номли кўрсатувлар туркуми орқали бутун Иттифоқ миқёсида кенг танилган.
У, шунингдек, 1989 йилда Тошкентга ташриф буюриб, "Юбилейный" спорт саройида ҳам оммавий сеанслар ўтказган эди.
1990-йиллардан бошлаб унинг даволаш усуллари илмий ҳамжамият ва Фанлар академияси томонидан асоссиз ҳамда сохта фан сифатида кескин танқид қилинган.
Шунга қарамай, у кейинги йилларда ҳам, жумладан, Нью-Йорк ва Москвада ўз оммавий фаолиятини давом эттирган.
Изоҳлар мавжуд емас