Ўзбекистон, Тошкент - Batafsil.uz. Украина дронлари Россиянинг Яндекс технология компаниясига тегишли дата-марказга яна зарба берди. Владимир шаҳридаги марказ шикастланиши оқибатида унинг фаолияти тўлиқ тўхтатилган, айрим хизматлардан фойдаланишда узилишлар юзага келган. Бу ҳафта давомида Яндекс инфратузилмасига қилинган учинчи ҳужум бўлди.
Компания Telegram орқали тарқатган хабарда ҳодиса оқибатида ҳеч ким жароҳатланмаганини маълум қилган. Айни пайтда мутахассислар марказ фаолиятини тиклаш ва алоқани қайта йўлга қўйиш устида ишламоқда.
Бундан аввал, пайшанба куни Россиянинг Сасово шаҳридаги, жума куни эса Москвадан жануби-ғарбий томонда жойлашган Калугадаги Яндекс дата-марказлари ҳам зарбага учраган. Ҳужумлар сунъий интеллект чат-боти ва ақлли уй қурилмалари каби айрим хизматлар ишида муаммолар келтириб чиқарган.
Россияда «Google»га қиёсланадиган Яндекс қидирув тизими билан бир қаторда такси чақириш ва таом буюртма қилиш хизматларини ҳам бошқаради. Компания маълум қилишича, дата-марказлар унинг хизматлари узлуксиз ишлаши учун муҳим аҳамиятга эга. Уларнинг қачон тўлиқ тикланишини олдиндан айтиш қийин.
Украина томони Россиянинг уруш олиб бориш имкониятларини молиялаштирадиган инфратузилма объектларига зарба беришини билдирган. Киев нуқтаи назаридан, бундай ҳужумлар Москвага шикастланган объектларни таъмирлаш учун қўшимча маблағ ва ресурс сарфлашга мажбур қилиши мумкин.
Ҳужумлар АҚШ президенти Дональд Трамп Украинага Россия нефтьни қайта ишлаш заводларига зарба беришни тўхтатиш ҳақидаги баёнот билан чиққанидан бир неча соат ўтиб содир бўлди. Трамп бундай қадам Россияга жаҳон бозорига кўпроқ дизель ёқилғиси етказиб бериш имконини бериши мумкинлигини айтган. Бу келишув Европа давлатларида танқидларга сабаб бўлган ва Украина президенти Владимир Зеленский билан дипломатик келишмовчиликни келтириб чиқарган.
Айни вақтда Россиянинг Украинага ҳужумлари ҳам давом этмоқда. Украина фавқулодда вазиятлар хизмати маълумотига кўра, Днепропетровск вилоятининг тўрт туманига тунги ҳужумлар оқибатида олти киши жароҳатланган. Маҳаллий расмийлар эса шанба куни Запорожьега қилинган зарбаларда камида 20 киши, жумладан, тўрт нафар бола ҳалок бўлганини билдирган.
Бундан олдин Украинанинг июль ойи ўрталаридан бери Россиядаги Wildberries логистика марказларига уюштирган дрон ҳужумлари маркетплейс ва ундаги юз минглаб сотувчиларга ҳам катта молиявий зарар етказганди. Мутахассислар компания ва сотувчиларнинг умумий эҳтимолий йўқотишларини 600–800 миллиард рубл деб баҳолаган эди.
Изоҳлар мавжуд емас