Ўзбекистон, Тошкент - Batafsil.uz. Украинанинг июль ойи ўрталаридан бери Россиядаги Wildberries логистика марказларига уюштирган дрон ҳужумлари маркетплейс ва ундаги юз минглаб сотувчиларга катта молиявий зарар етказган. Мутахассислар компания ва сотувчиларнинг умумий эҳтимолий йўқотишларини 600–800 миллиард рубл деб баҳоламоқда.
Data Insight тадқиқот агентлиги етакчи таҳлилчиси Сергей Семконинг Forbes журналига маълум қилишича, вайрон бўлган омборлар ва инфратузилмани тиклаш Wildberries'га 147–223 миллиард рублга тушиши мумкин. Агар объектларни тўлиқ бузиш, қурилиш чиқиндиларини олиб чиқиш ва ҳудудни қайта тиклаш талаб этилса, харажатлар 169–278,9 миллиард рублга етиши эҳтимоли бор.
Мутахассис товар сотувчиларининг эҳтимолий зарарини ҳам 445–507,8 миллиард рублга баҳолаган. Шу тариқа, маркетплейс ва сотувчиларнинг умумий зарари 600–800 миллиард рубл атрофида бўлиши мумкин.
Электрон савдо платформаларига товар етказиб берувчилар ассоциацияси раҳбари Маргарита Евстигнеева маълум қилишича, ҳужумлар оқибатида 400 мингдан ортиқ сотувчи зарар кўрган. Унинг баҳолашича, йўқ қилинган товарларнинг таннархи 200–300 миллиард рублни ташкил этади, бой берилган фойда ҳисобга олинганда эса умумий зарар 600–700 миллиард рублга етиши мумкин.
Айрим сотувчиларнинг омборларда сақланган товарларининг 95 фоизигача қисми ёниб кетгани айтилмоқда.
The Bell нашрининг 5 августдаги баҳоларига кўра, август бошида Wildberriesнинг ўзи кўрган тўғридан-тўғри зарар 100 миллиард рублдан ошган. Сотувчиларнинг зарари эса ўша пайтда 215–280 миллиард рублга баҳоланган.
Бу фонда Россиянинг Wildberries маркетплейси дрон ҳужумлари сабабли логистика тизимининг бир қисмини хорижга кўчириш имкониятини кўриб чиқмоқда. Компания узоқ муддат сақланадиган товарларни Ўзбекистон, Қозоғистон ва Беларусь омборларида жойлаштиришни режалаштирмоқда ва айрим маҳсулотлар аллақачон хорижий омборларга йўналтирила бошланган.
Изоҳлар мавжуд емас