Ўзбекистон, Тошкент - Batafsil.uz. Кинематография агентлиги раҳбарияти "Ўзбекфильм"нинг миллионлаб евролик қарз мажбуриятлари борлигини айтгач, матбуот бу рақамларнинг ортида нима турганини текшириб кўрди. Натижада расмий баёнотлар ва журналистик суриштирувлар ўртасида жиддий зиддиятлар юзага чиқди. Кинематография агентлиги раиси Жаҳонгир Аҳмедов эса воқеага муносабат билдирди.
Аввалроқ"Ўзбекфильм" киностудиясининг 1 миллиард сўмдан ортиқ солиқ қарзи ўз хўжалик фаолиятидан тушган маблағлар ҳисобидан тўлиқ қопланиб, аукционга қўйилиши арафасида турган 12 та автомобиль ҳам киностудия ихтиёрига қайтарилгани ҳақида хабар берган эдик. Бироқ бу жараён ортидан матбуотда турли муҳокамалар бошланди.
Хусусан, Uzdiplomat нашри бу масалада махсус журналистик суриштирув ўтказиб, расмийлар томонидан айтилган рақамлар ва ҳақиқий ҳолат юзасидан жиддий саволлар ва важларни ўртага ташлаган. Суриштирувга кўра, воқеалар ривожи 2020 йилдан бошланган. Ўша йили Даниянинг телетехнткалар савдоси билан шуғулланувчи йирик компанияларидан бири — Denmon Grouр билан ҳамкорлик шартномаси тузилган.
Шундан сўнг, 2021 йил 7 апрелда қабул қилинган президент қарорига мувофиқ, "Ўзбекфильм" учун кино ускуналарини харид қилиш назарда тутилган. Қарорга кўра, шартнома қийматининг 15 фоизи давлат бюджети ҳисобидан қопланиши, қолган 85 фоизи учун эса Австриянинг Raiffeisen Bank кредит линияси асосида "Ўзмиллийбанк" томонидан кредит ажратилиши белгиланган.
Бироқ нашр журналистларининг аниқлашича, ҳужжатларда кредит механизми кўрсатилгани билан, амалда "Ўзмиллийбанк" томонидан бугунги кунга қадар 23 миллион еврога яқин мазкур кредит агентликка тақдим этилмаган, чунки агентликнинг ўзи ҳам бу маблағни банкдан сўрамаган. Ҳатто Denmon Group компанияси ҳам Ўзбекистон тарафида 22–23 миллион евролик ҳақиқий қарз мавжуд эмаслигини тасдиқлаган.
Нашр манбаларига кўра, асл ускуналар қиймати аслида 3 миллион доллар атрофида бўлиб, айрим "Ўзмиллийбанк" манбалари бу борадаги бор-йўғи 1,6 миллион долларлик қарздорлик давлат бюджети ҳисобидан босқичма-босқич ёпиб келинаётганини билдирган.
Шу боис, нашр янги раҳбар Жаҳонгир Аҳмедов нима учун амалда мавжуд бўлмаган катта миқдордаги қарздорлик ҳақида баёнот бергани ва нега бундай маълумотлар жамоатчиликка тўлиқ очиқланмаётгани юзасидан қаттиқ шубҳа ва саволларни ўртага ташлаган.
Бунга жавобан Кинематография агентлиги раиси Жаҳонгир Аҳмедов ҳеч ким агентликдан олдиндан маълумот сўрамаганини, журналистлар томонидан қўйилган "кредит қарзи йўқ" деган сарлавҳада хатолик борлигини таъкидлаган.
Унинг тушунтиришича, гап тўғридан-тўғри кредит олингани ҳақида эмас, балки уч томонлама имзоланган шартномалар асосида вужудга келган кредит мажбурияти ҳақида бормоқда.
Агар кредит умуман мавжуд бўлмаганида, давлат мулки гаровга қўйилмас эди, шунинг учун шартнома имзоланиб, мол-мулк гаровга қўйилганининг ўзиёқ мажбурият мавжудлигини англатади.
Шу билан бирга, агентлик раҳбари киностудиядаги бошқа реал муаммоларга ҳам тўхталган. Жумладан, ходимларга тўпланиб қолган 3 миллиард сўмдан ортиқ иш ҳақи қарздорлиги, Миллий кинематографияни ривожлантириш марказининг 2,3 миллиард сўм ҳамда ВГИКнинг Тошкент филиалининг 3,8 миллиард сўм қарзга ботгани очиқланган.
Қолаверса, Renessans kino uyi биноси ҳалигача кадастр ҳужжатларига эга эмаслиги, ҳудудий бўлимларнинг 20 га яқин биноси, 1,76 гектар ер майдони ва 21 та машинаси эгасиз қолгани, раҳбарият ишга келган вақтда хизмат машиналарига Мажбурий ижро бюроси томонидан тақиқ қўйилгани маълум қилинган.
Айни пайтда барча объектлар тўлиқ хатловдан ўтказилаётгани ва ишлар якунида кенг жамоатчилик учун матбуот анжумани ўтказилиши қўшимча қилинган.
Изоҳлар мавжуд емас