Ўзбекистон, Тошкент - Batafsil.uz. Хитойнинг йирик саноат компанияларидан бири бўлган Zhongjin Guantai Industrial Development Co., Ltd. Ўзбекистон иқтисодиётига катта миқдордаги сармоя киритиш ниятини билдирди. Ўзбекистон Бош консулхонаси дипломатлари компания раиси Чжэн Цзянлун билан учрашув ўтказди.
Музокаралар давомида компаниянинг мамлакатимиздаги иштирокини кенгайтириш ва узоқ муддатли стратегик ҳамкорликни йўлга қўйиш масалалари муҳокама қилинган.
Компания томонидан тақдим этилган расмий мактубга кўра, янги энергетика соҳасига 1 миллиард доллар, тоғ-кон саноатига 2 миллиард доллар ҳамда инфратузилма ва туризм тармоқларига 300–500 миллион доллар миқдорида инвестиция киритиш режалаштирилган.
Чжэн Цзянлуннинг таъкидлашича, компания мутахассислари Ўзбекистон бозорини ўрганиб чиққан ва айниқса қайта тикланувчи энергия ҳамда инфратузилма соҳаларидаги имкониятларни юқори баҳолаган. Шу асосда шамол ва қуёш электр станцияларини қуриш, электр тармоқлари ҳамда кўмир саноати инфратузилмасини модернизация қилиш лойиҳаларида иштирок этиш кўзда тутилмоқда.
Шунингдек, Хитойнинг етакчи тоғ-кон компаниялари билан ҳамкорликда олтин, мис ва бошқа стратегик минерал ресурсларни қазиб олишга қаратилган йирик инвестиция фонди ташкил этиш режаси ҳам маълум қилинган. Компания Ўзбекистондаги ер ости бойликларини ўзлаштириш лойиҳаларида иштирок этишга қизиқиш билдирган.
Бундан ташқари, коммунал ва йўл-транспорт инфратузилмаси, саноат парклари ҳамда туризм объектларини барпо этиш бўйича лойиҳалар ҳам ҳамкорликнинг устувор йўналишлари сифатида қайд этилган.
Ушбу ташаббуслар амалга оширилса, улар Ўзбекистоннинг энергетика, саноат ва инфратузилма соҳаларига жалб қилинаётган энг йирик хорижий инвестиция лойиҳаларидан бирига айланиши мумкин.
Изоҳлар мавжуд емас