Ўзбекистон, Тошкент - Batafsil.uz. Ўзбекистонда ишлаб чиқарилган электротехника маҳсулотларининг илк партияси Суриянинг Ҳалаб шаҳрига етказиб берилди. Бунинг учун Тошкент вилоятидаги Premier Electrotech қўшма корхонаси ва Суриянинг Kalash Trading компанияси ўртасида қиймати 5 миллион долларлик экспорт шартномаси имзоланган.
Аввалроқ Савдо-саноат палатаси раиси Даврон Ваҳобов ҳам экспорт ҳажмини ошириш учун масофаси узоқ ва қиммат Европа бозорларидан кўра, логистикаси арзон, рақобат паст ва эҳтиёж юқори бўлган Ироқ ҳамда Сурия йўналишларига эътибор қаратишни таклиф
қилганди.
Келишув доирасида июль ойида Premier бренди остида ишлаб чиқарилган кондиционер, музлатгич ва кир ювиш машиналаридан иборат маҳсулотлар партияси юк автомобилларида Ҳалабга юборилган.
Маҳсулотлар Сурияга Туркманистон, Эрон, Озарбайжон ва Туркия ҳудудлари орқали ўтувчи муқобил транзит коридори бўйлаб етказилган. Юклар манзилига 20 кун ичида етиб борган.
Экспорт йўналишини йўлга қўйиш доирасида жорий йил июнь ойида Суриянинг Kalash Trading компанияси раҳбари Аҳмад Калашнинг Тошкентга ташрифи ташкил этилган. Учрашувлар натижасида икки компания ўртасида экспорт бўйича келишувга эришилган.
Изоҳлар мавжуд емас