Ўзбекистон, Тошкент - Batafsil.uz. Ўзбекистон 2026 йилнинг сентябрь ойида ҳам олтин экспортини амалга оширмади. Статистика агентлиги маълумотларига кўра, Марказий банк йил бошидан бери фақатгина апрель (1,5 миллиард долларлик) ва июль (1,3 миллиард долларлик) ойларида қимматбаҳо металл сотган, қолган ойларда эса заводлардан харид қилинган олтинлар давлат захирасига жойлаб келинган.
Ўтган йилларда қимматбаҳо металл сотуви мамлакат жами экспортининг камида учдан бир қисмини ташкил этган.
Масалан, 2025 йилнинг тўққиз ойида 9,8 миллиард долларлик олтин сотилган бўлиб, умумий экспорт тушумларининг 35,9 фоизини эгаллаган.
Жорий йилнинг мос даврида эса жами экспортда олтин улуши кескин камайиб, 10,8 фоизни ташкил этган.
Сўнгги вақтларда олтин экспортининг қисқартирилиши фонида мамлакат захира ҳажми сезиларли даражада ошиб бормоқда.
2026 йил 1 октябрь ҳолатига кўра, Ўзбекистон захирасида 14,3 миллион унция (446,9 тонна) олтин сақланмоқда. Мазкур ҳажм январь ойи бошида 12,6 миллион унцияни (391,9 тонна) ташкил этган бўлиб, тўққиз ой давомида захирадаги қимматбаҳо металл миқдори қарийб 55 тоннага кўпайган.
Эслатиб ўтамиз, аввалроқ Марказий банк август ойида 8 тонна олтин харид қилганди.
Изоҳлар мавжуд емас