Ўзбекистон, Тошкент – Batafsil.uz. Ўзбекистон Президентининг Қозоғистонга ташрифи арафасида Ўзбекистон-Қозоғистон иқтисодий муносабатларида янги босқичга эришилди: томонлар инвестициялар ва тадбиркорликни ривожлантириш соҳасидаги ҳамкорликни кенгайтириш тўғрисида шартномалар имзоладилар. Бу ҳақда мухбиримиз хабар бермоқда.
Ўтган "Қозоғистон-Ўзбекистон" бизнес-форумида икки мамлакат ҳукумати 4,4 миллиард долларлик 34 та инвестиция лойиҳаси ва 2,6 миллиард долларлик еттита савдо шартномасини биргаликда амалга оширишга келишиб олган. Шартномалар ҳужжатлар рўйхати билан мустаҳкамланган.
Лойиҳаларнинг аксарияти қишлоқ хўжалиги соҳасида амалга оширилади. Ҳамкорлик жиҳатлари энергетика, тоғ - кон саноати ва геология, транспорт, кимё саноати, қурилиш, электротехника, машинасозлик, фармацевтика ва бошқа соҳаларга ҳам тегишлидир.
Тадбирнинг очилиш маросимида Қозоғистон Бош вазирининг ўринбосари Серик Жумангарин икки қўшни давлат ўртасидаги ҳамкорлик муҳимлигини таъкидлаб, Ўзбекистон билан савдо алоқаларининг қуйидаги статистикасини келтирган:
"Ўзбекистон Қозоғистоннинг энг йирик савдо ҳамкорларидан бири бўлиб, 2023 йил якунлари бўйича еттинчи ўринни эгаллаб турибди. Ўзбекистон билан савдо мамлакатимизнинг Марказий Осиё мамлакатлари билан умумий товар айланмасининг 57 фоизидан ортиғини ташкил этади. Сўнгги беш йил ичида икки томонлама товар айланмаси 29 фоизга ўсиб, 2022 йилда беш миллиард долларлик маррага етди. Давлатимиз раҳбарлари томонидан қўйилган вазифага эришиш учун савдо — сотиқдаги муаммоларни тизимли ҳал этиш ва товар айирбошлашнинг янги ўсиш нуқталарини излаш ҳамда ўрта муддатли истиқболда 10 миллиард долларлик маррага эришиш кўзда тутилган", - деди у.
Шу билан бир вақтда Қозоғистон-Ўзбекистон ишбилармонлар кенгаши давомида томонлар Қозоғистонда Савдо уйи ва Ўзбекистон Республикаси Бизнес марказини очиш, шунингдек, Тошкентда Қозоғистон-Ўзбекистон бизнес ассоциациясини ташкил этиш тўғрисида келишувга эришишган. "Атамекен" миллий тадбиркорлар палатасининг арбитраж маркази ва Тошкент халқаро арбитраж маркази ўртасида ҳамкорлик тўғрисида битим имзоланган.
Мажлисда тадбиркорлардан ташқари икки республиканинг Савдо палаталари ва Ташқи ишлар вазирликлари вакиллари ҳам иштирок этган.
Таъкидланишича, тузилган шартномалар икки мамлакат ўртасидаги тадбиркорлик муносабатларини ҳуқуқий тартибга солишни кучайтириш ва савдо алоқаларини кенгайтиришга қаратилган.
Эслатиб ўтамизки, кеча Ўзбекистон президенти давлат ташрифи билан Қозоғистонга йўл олди.
Изоҳлар мавжуд емас