Ўзбекистон, Тошкент - Batafsil.uz. Тошкент шаҳрида профилактика инспектори 10 минг доллар пора олаётган вақтида қўлга олинди. Маълум қилинишича, тезкор тадбир Давлат хавфсизлик хизматининг Тошкент шаҳар бошқармаси ҳамда Бош прокуратура ҳузуридаги Департамент ходимлари ҳамкорлигида ўтказилган.
Унда Учтепа тумани Ҳуқуқбузарликлар профилактикаси бўлими катта инспектори фуқародан ноқонуний равишда 10 минг доллар олган вақтида ашёвий далиллар билан ушланган.
Дастлабки маълумотларга кўра, инспектор 2025 йил декабрь ойида фуқарога тегишли компания ҳужжатларини сохталаштириш орқали IT хизматлари кўрсатиш баҳонасида чет элликдан 450 минг доллар олган шахсга нисбатан жиноят иши қўзғатиш ва уни жавобгарликка тортишни ваъда қилган. Шунинг эвазига у пул талаб қилгани аниқланган.
Терговга қадар текширувда эса жорий йил февраль ойида ички ишлар органлари мазкур ҳолат бўйича жиноят иши қўзғатишни рад этгани маълум бўлган.
Ҳозирда ҳолат юзасидан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, Тошкент вилоятининг Чирчиқ шаҳрида ички ишлар органлари ходимига нисбатан жиноят иши қўзғатилганди. Унда ҳам профилактика инспектори айбланмоқда.
Изоҳлар мавжуд емас