Ўзбекистон, Тошкент - Batafsil.uz. Ўзбекистон ва Туркия ўзаро товар айирбошлаш ҳажмини 5 миллиард долларга етказиш учун савдо тўсиқларини камайтириш ва экспорт-импорт тартибларини соддалаштиришга келишди. Бу масалалар 13 октябрь куни Анқарада икки мамлакат вазирликлари вакиллари иштирокида ўтказилган савдо бўйича ишчи гуруҳ йиғилишида муҳокама қилинди.
Учрашувда товарларни икки мамлакат бозорларига олиб киришни енгиллаштириш, тариф ва нотариф чекловларни қисқартириш ҳамда тадбиркорлар учун қулай шароит яратиш масалалари кўриб чиқилган.
Томонлар қишлоқ хўжалиги, электротехника ва енгил саноатни ҳамкорликнинг устувор йўналишлари сифатида белгилади. Шунингдек, маҳсулотларни стандартлаштириш, сифатини текшириш ва мувофиқлик сертификатларини ўзаро тан олиш масалалари муҳокама қилинган. Бу чоралар экспорт жараёнини енгиллаштириш ва компанияларнинг харажатларини камайтиришга қаратилган.
Электротехника маҳсулотлари савдосидаги масалаларни ҳал қилиш учун алоҳида техник ишчи гуруҳ тузишга келишилган. Бундан ташқари, имтиёзли савдо тўғрисидаги келишув қамровини кенгайтириш, унга кўпроқ товар турларини киритиш ва экспортчилар учун қўшимча имкониятлар яратиш таклифлари ҳам кўриб чиқилган.
Йиғилиш якунида эришилган келишувларни мустаҳкамловчи баённома имзоланган. Энди томонлар савдони соддалаштириш ва товар айирбошлаш ҳажмини 5 миллиард долларга етказиш учун аниқ чора-тадбирларни ишлаб чиқиши керак.
Бундан олдин Ўзбекистон Республикаси Президенти, Қуролли Кучлар Олий Бош Қўмондони Шавкат Мирзиёев мудофаа вазири Шуҳрат Холмуҳамедовнинг Туркия билан ҳарбий ва ҳарбий-техник ҳамкорликни ривожлантириш борасидаги ҳисоботини тинглаганди. Учрашувда икки давлат ўртасидаги мудофаа соҳасидаги алоқаларни сифат жиҳатидан янги босқичга олиб чиқиш истиқболлари кўриб чиқилган эди.
Изоҳлар мавжуд емас