Ўзбекистон, Тошкент - Batafsil.uz. Ўзбекистонда тадбиркорлар ҳамжамияти сони 1,2 миллион кишига етди. Бу ҳақда 18 август куни Хоразм вилоятида тадбиркорлар билан очиқ мулоқот чоғида Президент Шавкат Мирзиёев маълум қилди. У тадбиркорларни касб байрами билан ҳам табриклади.
Давлат раҳбари таъкидлаганидек, тадбиркорлик фаолиятини қўллаб-қувватлаш мақсадида биринчи шундай учрашув ўтказилганидан буён беш йил давомида 84 та қонун, шунингдек, 861 та фармон ва қарор қабул қилинди.
Натижада бизнес учун кредит портфели қарийб уч баробарга ошиб, 450 триллион сўмга етди. Тадбиркорларга берилган солиқ ва божхона имтиёзлари ҳажми эса 650 триллион сўмни ташкил этди. Шу даврда корхоналарнинг асосий капиталга киритган инвестициялари ҳам уч баробарга ошиб, 363 триллион сўмга етди.
Шу билан бирга, саноат ишлаб чиқариши ва хизматлар соҳасининг ҳудудий қамрови кенгайди. Саноат ишлаб чиқариш ҳажми 100 миллион доллардан ошадиган туманлар сони 66 тадан 116 тага, хизматлар ҳажми 1 триллион сўмдан юқори бўлган ҳудудлар сони эса 41 тадан 152 тага етди.
Бундан ташқари, қарийб 3,5 мингта маҳаллий корхона халқаро маркетплейсларга чиқди. Маҳаллалар даражасида ўз бизнесини бошлаган юзлаб тадбиркорлар эса мамлакат бўйлаб филиаллар очиб, ўз брендларини яратди.
"Бугун тадбиркорларимиз бизнес яратиш босқичидан капитални кўпайтириш босқичига ўтмоқда", — деди Шавкат Мирзиёев.
Жорий очиқ мулоқот тадбиркорлар билан ўтказилган учрашувлар орасида энг оммавий бўлди. Унда илк бор қарийб 25 минг нафар тадбиркор Президент билан мулоқотга уланди.
Аввалроқ Ўзбекистонда тадбиркорлар учун мажбурий талабларнинг ягона реестри яратилиши хабар қилинган эди. Ушбу тизимга киритилмаган талабларни бажармаганлик учун бизнес вакилларини жавобгарликка тортиш мумкин бўлмайди.
Изоҳлар мавжуд емас