Ўзбекистон, Тошкент - Batafsil.uz. Ўзбекистонда тадбиркорлик субъектларига нисбатан жарима қўллаш тартиби қайта кўриб чиқилади. Президент жарима маблағ йиғиш воситаси эмас, балки соҳага тартиб ва интизом олиб кириш ҳамда профилактикага хизмат қилиши кераклигини таъкидлади.
Ҳозир 51 та идора молиявий жарима қўллаш ваколатига эга. Айрим идораларда жаримадан тушган маблағнинг бир қисми шу ташкилотнинг ўзида қолиши "текширса – қўрқади, қўрқса – тўлайди" каби нотўғри ёндашувни келтириб чиқараётгани танқид қилинган.
Шунингдек, давлат корхоналари томонидан харид қилинган товарлар бўйича тадбиркорларнинг закалат маблағларини қайтариш жараёни автоматлаштирилади.
Келаси йилдан тадбиркор ва давлат ўртасидаги низоларда "тадбиркорнинг ҳақлилик презумпцияси" жорий этилади. Бунда тадбиркорнинг айби судда исботланмагунча у айбсиз ҳисобланади ва унга жарима ёки бошқа таъсир чораси қўлланмайди.
Биринчи марта қоидабузарлик содир этган ва одамлар ҳаёти, соғлиғи ёки мулкига зарар етказмаган тадбиркорларга нисбатан "Биринчи хато учун огоҳлантириш" қоидаси қўлланади. Уларга аниқланган камчиликларни бартараф этиш учун 10 кун муддат берилади.
Назорат органлари биринчи инстанциядан кейинги ҳар бир суд босқичида давлат божини тўлайди. Шунингдек, Савдо-саноат палатаси ҳузуридаги Эксперт кенгашига божхона, қурилиш, санитария, карантин ва ветеринария соҳаларидаги низоларни ҳам кўриб чиқиш ваколати берилади.
Шунингдек, бугун тадбиркорлар учун электр ва газга 100 фоизлик аванс тўлови 15 фоизга туширилгани маълум қилинганди.
Изоҳлар мавжуд емас