Ўзбекистон, Тошкент - Batafsil.uz. Бойсун туманида юз берган экологик ҳодиса натижасида табиатга етказилган зарар учун катта миқдордаги компенсация тўлови белгиланди. Мазкур жарима Surxan Gas Chemical Operating Company компаниясига қарашли қудуқдан чиққан нефть маҳсулотлари 23-апрелдаги кучли ёғингарчиликлар оқибатида "Хонгаронсой"га оқиб тушгани сабабли қўлланилдган.
Олдинроқ ижтимоий тармоқларда Сурхондарё вилоятида сув тизими ва экологик вазият билан боғлиқ ноаниқ ҳолатлар акс этган видео тарқалганди. Гувоҳлар томонидан қайд этилишича, мазкур ҳолат вилоят экологиясини инқироз ёқасига олиб келиши мумкин.
Ҳодиса Surxan Gas Chemical Operating Company компаниясига тегишли қудуқдан нефть маҳсулотлари аралашган суюқликнинг сизиб чиқиши оқибатида юзага келган. Табиий сув ҳавзаларини ифлосланишдан асраш мақсадида Eriell Oilfield Services Middle East DMCC корхонасининг махсус техникалари ёрдамида 11 та хандақ қазилиб, суюқликни чеклашга уринилган. Бироқ кучли ёғингарчиликлар натижасида суюқликнинг бир қисми "Хонгаронсой"га ўтиб кетган.
Ҳозирда нохуш ҳолат бартараф этилиб, сув ҳавзаси нефть маҳсулотларидан тозаланган. Экология ва иқлим ўзгариши миллий қўмитаси Давлат экологик назорат инспекцияси (Экополиция) томонидан олиб борилаётган ўрганиш ишлари ниҳоясига етгач, тўпланган барча ҳужжатлар ҳолатга ҳуқуқий баҳо бериш учун ҳуқуқни муҳофаза қилиш органларига тақдим этилади.
Изоҳлар мавжуд емас