Ўзбекистон, Тошкент - Batafsil.uz. 2027 йил 1 январдан сув олиш тартибини йил давомида биринчи марта бузган ва бунинг натижасида одамлар ҳаёти, соғлиғи ёки бошқаларнинг мулкига зарар етказмаган юридик шахсларга дастлаб огоҳлантириш берилади. Агар корхона белгиланган камчиликларни 10 кун ичида бартараф этмаса, унга молиявий санкция қўлланилади. Бу тартиб Вазирлар Маҳкамасининг қарори билан тасдиқланган низомда белгиланган.
Янги қоидалар қишлоқ хўжалиги, балиқчилик, саноат, энергетика ва маиший эҳтиёжлар учун сув оладиган юридик шахсларга тааллуқли. Сувни белгиланган лимитдан ортиқча ёки шартномасиз олиш, сувни бошқариш ва ҳисобга олиш воситаларидан фойдаланмаслик, махсус рухсатномасиз ёки ўзбошимчалик билан сув олиш қоидабузарлик ҳисобланади.
Биринчи марта қоидабузарлик аниқланганда, масъул инспекция корхонани suvnazorat.uz электрон платформаси орқали огоҳлантиради ва камчиликларни бартараф этиш бўйича кўрсатма беради. Талаблар 10 кун ичида бажарилмаса, молиявий санкция қўлланилади.
Жарима миқдори Сув кодексининг 164-моддасида белгиланган фоизлар асосида, ҳар минг куб метр сув учун базавий ҳисоблаш миқдорига нисбатан ҳисобланади. Агар корхона санкция қўлланилганидан кейинги бир йил ичида қоидабузарликни такрорласа, санкция миқдори беш бараварга оширилади.
Қарорда тадбиркорлар учун тўловни камайтириш имконияти ҳам назарда тутилган. Агар юридик шахс санкция тўғрисидаги қарор ва ҳисоб-китобни олганидан кейин бир ой ичида белгиланган сумманинг 50 фоизини ихтиёрий тўласа, қолган қисмини тўлашдан озод этилади. Бундай ҳолатда ҳуқуқий таъсир чораси қўлланилмаган деб ҳисобланади.
Шунингдек, молиявий санкцияни олти ойдан кечиктирмай бўлиб-бўлиб тўлаш мумкин. Агар бир ой ичида ихтиёрий тўлов амалга оширилмаса, инспекция судга даъво аризаси киритади.
Суд санкцияни ноқонуний деб топган тақдирда, тўланган маблағлар 15 кун ичида қайтарилади. Қайтариш кечиктирилган ҳар бир кун учун Марказий банкнинг асосий ставкаси бўйича фоиз ҳам тўланади.
Олдинроқ Қашқадарёда 1 триллион сўмлик сув ва канализация тармоқлари қурилишини икки ойда якунлаш топширилганди.
Изоҳлар мавжуд емас