Ўзбекистон, Тошкент - Batafsil.uz. Ижтимоий тармоқларда Андижон вилоятининг Пойтуғ шаҳридаги туғруқ бўлимида тиббиёт ходимларига пул бериш ва зарур буюмларни олиб келишга тўғри келаётгани ҳақида видео тарқалди. 2026 йил 20 октябрда олингани айтилган видеода беморнинг яқини шифокорларга 150 минг сўм берилганини, шунингдек, дори-дармон, суюқ совун ва қўлқоп каби буюмлар ҳам олиб келинганини айтади.
Видеода бир киши ёши катта аёлдан тиббиёт ходимлари пул сўраётган-сўрамаётганини сўрайди. Аёл пул берилганини билдириб, уч кун ётса, беморга қарашларини айтади. Суҳбатда 150 минг сўм ҳақида ҳам гап боради.
Видеони тасвирга олган аёлнинг айтишича, унинг овсини туғруқхонага тўлғоқ билан келган ва фарзандли бўлган. Унинг таъкидлашича, тиббиёт ходимлари аввал ҳам дори-дармон сўраган, оила аъзолари эса уларни олиб келган. Шунингдек, туғруқхонага суюқ совун ва қўлқоплар ҳам олиб кирилган. Аёлнинг билдиришича, улар камида 10 та қўлқоп олиб келган.
Видеода суҳбатдошлар беморга қараш тиббиёт ходимларининг вазифаси эканини айтиб, пул беришга қарши фикр билдирган. Бироқ кадрларда пул нима мақсадда сўралгани ва ушбу маблағ кимга берилгани тўлиқ аниқлаштирилмаган.
Ҳолат бўйича Андижон вилояти Соғлиқни сақлаш бошқармаси ёки бошқа масъул идораларнинг расмий муносабати тақдим этилмаган.
Изоҳлар мавжуд емас