Ўзбекистон, Тошкент - Batafsil.uz. Саудия Арабистонининг Даммам шаҳридаги Қирол Фаҳд халқаро аэропортига 21 октябрь куни кечқурун қилинган ҳужум оқибатида икки киши ҳалок бўлди, яна саккиз киши жароҳатланди. Қурбонлар Саудия Арабистони ва Ҳиндистон фуқаролари бўлган. Мамлакат Фуқаро авиацияси бош бошқармаси 22 октябрь куни қурбонлар сони бир нафарга ошганини маълум қилди.
Жароҳатланганлар орасида Саудия Арабистони, Ҳиндистон, Яман, Бангладеш ва Непал фуқаролари бор. Уларнинг айримлари оғир аҳволда бўлиб, шифохоналарда тиббий ёрдам олмоқда.
Ҳужум натижасида аэропорт инфратузилмасига ҳам моддий зарар етган. Масъул идоралар хавфсизлик хизматлари билан биргаликда зарар кўламини баҳолаш ва йўловчилар ҳамда ходимлар хавфсизлигини таъминлаш чораларини кўрмоқда.
Саудия Фуқаро авиацияси бош бошқармаси маълум қилишича, аэропорт фаолияти тикланган ва ҳаво қатновлари одатий тартибга қайтган.
Ҳозирча ҳужум қандай восита билан амалга оширилгани ва уни ким уюштиргани ҳақида расмий маълумот берилмаган.
Сўнгги ҳафталарда Саудия Арабистонидаги аэропортлар ва бошқа инфратузилма объектларига ҳам бир неча марта ҳужум қилинган. Бироқ Даммам аэропортидаги сўнгги ҳодиса учун масъулиятни ҳеч бир гуруҳ расман ўз зиммасига олгани ҳақида маълумот йўқ.
Олдинроқ Яманнинг ҳусийлар ҳаракати Саудия Арабистонига баллистик ракеталар ва дронлар билан ҳужумларни кучайтиргани ортидан Etihad Airways ва Qatar Airways мамлакатга айрим рейсларни вақтинча тўхтатганди.
Изоҳлар мавжуд емас