Ўзбекистон, Тошкент - Batafsil.uz. Фарғонада Афғонистоннинг "Kam Air" авиакомпанияси билан ҳамкорликни кенгайтириш масалалари муҳокама қилинди. Минтақада янги халқаро авиакомпания ташкил этиш лойиҳаси асосий мавзулардан бири бўлди.
Бу ҳақда Фарғона вилояти ҳокими Хайрулло Бозоровнинг "Kam Air" раҳбари Умар Муҳаммад Сулаймон бошчилигидаги делегация билан учрашувида сўз борди. Музокараларда Uzbekistan Airports тижорат фаолияти департаменти бошлиғи Тимур Халилов ҳам иштирок этди.
Томонлар Фарғона вилояти делегациясининг июль ойи охирида Афғонистонга ташрифи якунларини муҳокама қилдилар. Ўшанда савдо-иқтисодий ва сармоявий ҳамкорликни кенгайтириш масалалари муҳокама қилинган эди. Бу галги учрашувда авиация соҳасига урғу берилди.
Фарғонада янги халқаро авиакомпания ташкил этиш ташаббусига алоҳида эътибор қаратилди. Учрашув иштирокчилари лойиҳани амалга ошириш имкониятлари, зарур инфратузилма ва йўловчиларга хизмат кўрсатишни ташкил этиш масалаларини кўриб чиқдилар.
Шунингдек, томонлар лойиҳани муҳокама қилишдан амалий амалга оширишга ўтишга келишиб олдилар. Бунинг учун тегишли ташкилот ва мутахассисларни жалб қилиб, барча ишларни халқаро стандартлар асосида ташкил этиш режалаштирилган.
Эслатиб ўтамиз, "Kam Air" авиакомпаниясининг биринчи самолёти Тошкент аэропортига 2017 йил ноябрь ойида қўнди.
Изоҳлар мавжуд емас