Ўзбекистон, Тошкент – Batafsil.uz ЯА. Тошкент вилояти Юқоричирчиқ тумани Йик-ота кишлоғидаги Иккинчи жаҳон урушида ҳалок бўлган ватандошларимиз хотирасига ўрнатилган ёдгорликни реставрация қилиш ишлари ўз ниҳоясига етказилган. Batafsil.uz мухбири хабар қилишича, реставрациядан чиққан ёдгорлик янги жойга ўрнатилган.
Ёдгорлик номаълум йўналишда олиб кетилганлиги ҳақида ноябрь ойининг охирида Facebookдаги “Потребитель.уз” ёпиқ гуруҳи аъзолари маълум қилишган эди. Шу ҳудуддаги маҳалла фуқаролар йиғини ҳам ёдгорлик тақдири хусусида ҳеч нарса айта олмаган. Биргина ИИББ матбуот хизмати кўмагида вазиятга ойдинлик киритилди.
Бошқарма берган маълумотга кўра, Иккинчи жаҳон урушида ҳалок бўлганлар хотирасига барпо этилган ёдгорлик аянчли аҳволга келиб қолганлиги учун реставрацияга олиб кетилган. Унинг жойида эса бинолар қурилиши бошлаб юборилган.
Ахборот ва оммавий коммуникациялар Агентлиги тарқатган хабарга ҳавола қилган ҳолда “Потребитель.уз” гурухи маъмурияти билдиришича, ёдгорлик тўлиқ таъмирланиб, янги жойда, яъни Йик-ота кишлоғининг замонавий маркази яқинида ўрнатилган. Шу муносабат билан 8 декабрь куни тантанали маросим ўтказилган.
Агентлик шуни эслатиб ўтмоқдаки, ёдгорлик даставвал “Уч аскар” деб номланган. Монумент 1985 йилда ўрнатилган бўлиб, унинг очилишида ўша пайтдаги Германия демократик республикаси Давлат кенгаши раиси Эрих Хонеккер шахсан иштирок этган.
Гуруҳ маъмуриятининг фикрича: “Ёдгорликнинг бузилиши билан боғлиқ шов-шув бесамар кетгани йўқ. Ёдгорлик гуруҳимиз томонидан жамоат назоратига олинганлиги боис барча масъулларни огоҳликка чақиришга муваффақ бўлдик”.
Изоҳлар мавжуд емас