Ўзбекистон, Тошкент - Batafsil.uz. Жорий йилнинг ўтган 10 ойида Коррупцияга қарши курашиш агентлиги давлат буюртмачилари томонидан амалга оширилган умумий қиймати 36,1 миллиард сўмлик 33 та давлат харидида қонунбузилишларни аниқлади. Агентлик тақдимномалари асосида ушбу харидларни бекор қилиш орқали қонунбузилишларнинг олди олинди.
Агентлик маълум қилишича, аниқланган ҳолатлардан бири оммавий ахборот воситаларида эълон қилинган танқидий мақола асосида ўрганилган. Унда "Ўзбекнефтгаз" буюртмачилигида ўтказилган умумий қиймати 4,38 миллиард сўмлик тўртта харидда қонунбузилишлар аниқланган.
Шунингдек, агентликка келиб тушган мурожаат асосида ўтказилган ўрганишда "Самарқанд Инвест Компанияси" акциядорлик жамияти буюртмачилигидаги бошланғич қиймати 3,7 миллиан сўмлик иккита давлат харидида ҳам қонунбузилишлар қайд этилган.
Бундан ташқари, "Рақамли комплаенс" ахборот дастурий комплекси орқали "Болаларни қўллаб-қувватлаш" жамоат фонди буюртмачилигида бюджет маблағлари ҳисобидан амалга оширилиши режалаштирилган, бошланғич қиймати 2,2 млрд сўмлик харидда қонунбузилиш ҳолатлари аниқланган. Агентлик кўрсатмаси асосида ушбу харид бекор қилинган.
Агентлик коррупция ҳолатларига дуч келган фуқароларни 1253 қисқа рақами орқали мурожаат қилишга чақирган.
Изоҳлар мавжуд емас