Ўзбекистон, Тошкент - Batafsil.uz. "Imarat Development" компаниясидан хонадон сотиб олган фуқаролар компания номи ва ходимлари ўзгаргани, қурилиш ишлари ҳамда тўловлар тақдири юзасидан хавотир билдирмоқда. Компания асосчиси сифатида танилган таниқли санъаткор Шахзода Мухаммедованинг эри - Марат Хайруллаевич эса ўзининг видеомурожаатларида унга босим ўтказилаётгани, офисга кириши чеклангани ва компанияни унинг розилигисиз қайта номлашганини маълум қилган.
Харидорлардан бирининг айтишича, у Imarat Development компаниясидан хонадон сотиб олган. Бироқ кейинчалик компания офисига борганида, ташкилот номи ўзгаргани ва у ерда бошқа ходимлар ишлаётганини кўрган. Унга Марат Хайруллаевич компаниянинг фақат юзи ва маркетологи бўлгани, ишдан кетгани ҳамда энди янги жамоа масалаларни ҳал қилиши айтилган.
Мурожаатчилар қурилиш ишлари ҳали якунланмагани, компаниядаги ўзгаришлар эса харидорларда ишончсизликни кучайтирганини билдирмоқда. Улар орасида уй-жой учун катта маблағ тўлаган оилалар борлиги таъкидланиб, вазиятга ҳуқуқий баҳо берилиши ва харидорларга ёрдам кўрсатилиши сўралган.
Марат Хайруллаевич ўзининг расмий видеомурожаатларида компания атрофидаги вазиятга изоҳ берган. Унинг айтишича, айрим шахслар компанияни ундан тортиб олишга уринган, ўзи ва оиласига нисбатан босим ҳамда таҳдидлар бўлган. Шунингдек, у офисга киришига тўсқинлик қилингани ва лойиҳаларни бошқариш имконияти чекланганини билдирган.
Хайруллаевич компания номи Imarat Development компаниясидан "Imtiyoz"га ўзгартирилганини ҳам унинг розилигисиз амалга оширилган қарор сифатида баҳолаган. Унинг сўзларига кўра, сентябрь ойида хорижда бўлганида компаниянинг молиявий масалаларига масъул бўлган Жасур Азизов унга қўнғироқ қилган. Хайруллаев молиявий фаолиятда жиддий камомадни аниқлаганини, Азизов эса ўз ҳаракатлари оқибатида юзага келганини айтган бир неча миллион долларлик зарарни банк кредитлари орқали қоплашни таклиф қилганини даъво қилган.
У бундай таклифга қарши чиққанини ва ўз номи билан боғлиқ компанияларга қўшимча кредитлар олинишига рози эмаслигини айтган. Хайруллаевнинг таъкидлашича, компания номининг ўзгартирилиши ҳам айнан шу келишмовчиликлардан кейин содир бўлган.
Шунингдек, у компанияга алоқадор айрим шахслар банклардан кредит олиш мақсадида мижозларга тегишли тайёр уй-жойларни гаровга қўйишни режалаштирган бўлиши мумкинлигини билдирган. Хайруллаевич бу ҳолатга йўл қўймаслигини, лойиҳаларни якунлаш ва харидорларга хонадонларни топшириш ниятида эканини айтган.
Унинг маълум қилишича, юзага келган вазият бўйича ҳуқуқни муҳофаза қилувчи органларга расмий мурожаатлар киритилган. Хайруллаевич ҳозирча босим ўтказаётгани айтилган шахсларнинг номини ошкор қилмаслигини, бу масалага ҳуқуқий баҳо берилишини кутаётганини билдирган.
Айни пайтда харидорларнинг асосий саволи очиқ қолмоқда: компаниядаги ўзгаришлар улар тўлаган маблағлар ва сотиб олган хонадонлар тақдирига қандай таъсир қилади? Марат Хайруллаевич эса қурилишларни якунлаш ва уйларни харидорларга топшириш бўйича ваъда бермоқда.
Ҳозирча ушбу вазият бўйича ҳуқуқни муҳофаза қилувчи органларнинг расмий хулосаси берилмаган.
Изоҳлар мавжуд емас