Ўзбекистон, Тошкент - Batafsil.uz. Олий Мажлис Сенатининг ялпи мажлисида "Лотин ёзувига асосланган ўзбек алифбосини жорий этиш тўғрисида"ги Қонунга ўзгартириш киритиш ҳақида"ги қонун атрофлича муҳокама қилиниб, сенаторлар томонидан маъқулланди. Вазирлар Маҳкамаси Давлат тилини ривожлантириш департаменти раҳбари Нодиржон Жонузоқов ўз чиқишида ушбу ҳужжат давлат раҳбари ташаббуси билан илгари сурилганини ва ўзбек тилини рақамли дунёда фан ҳамда технологиялар тилига айлантиришга қаратилган тарихий ислоҳот эканини таъкидлади.
Амалдаги алифбодаги Оʻ ва G’ ҳарфларидаги апостроф ва тепа алоҳида белгилари клавиатурада матн теришда, IT соҳасида ва компютер дастурий таъминотида доимий чалкашлик ва техник мураккабликларни келтириб чиқараётган эди. Биргина ҳарфни киритиш учун бир нечта амални бажариш талаб этилгани сабабли дастурлар кўпинча бу белгиларни хато деб қабул қиларди.
Янги олинган ва такомиллаштирилган ҳарфлар рақамли технологияларга ва халқаро стандартларга тўлиқ мослаштирилган. Илгари 5–6 та ҳаракат билан ёзиладиган мураккаб ҳарфлар энди клавиатурадаги алоҳида битта тугмани босиш орқали осон киритилади.
IT соҳаси вакиллари томонидан клавиатуранинг бўш ячейкаларига янги 4 та ҳарфни жойлаштириш бўйича таклифлар ишлаб чиқилган ва амалиётга татбиқ этилмоқда. Бундан ташқари, кирилл ва эски лотин ёзувидаги матнларни янги алифбога автоматик равишда ўгирадиган махсус онлайн дастурлар ва веб-сайтлар аллақачон ишга туширилган.
Йиллар давомида икки хил алифбонинг (кирилл ва амалдаги лотин) параллель қўлланиши оқибатида юзага келган ноаниқликларга чек қўйилади. Қонун кучга киргач, мамлакатдаги сиёсий ва расмий майдонда — барча оммавий ахборот воситалари, давлат органлари, ташкилотлар ва расмий иш юритишда фақат ягона, стандартлаштирилган ва такомиллаштирилган алифбодан фойдаланиш мажбурий этиб белгиланади.
Оддий аҳоли учун ҳеч қандай мажбурий босим ёки чекловлар бўлмайди. Фуқаролар ўзларининг шахсий ва эркин ёзишмаларида ўзларига қулай бўлган ва муқаддам ўрганган алифбосидан фойдаланишни давом эттиришлари мумкин.
Ушбу ислоҳотни амалиётга тўлиқ ва асоратсиз татбиқ этиш мақсадида Ҳукумат томонидан соҳа мутахассисларини ўқитиш, малакасини ошириш ва янги ўқув қўлланмаларини яратишни ўз ичига олган алоҳида чора-тадбирлар дастури амалга оширилади.
Сенат томонидан маъқулланган қонун белгиланган тартибда кучга кириши учун Президент имзолаши кутилмоқда.
Изоҳлар мавжуд емас