Ўзбекистон, Тошкент - Batafsil.uz. Бугун, 5 июндан бошлаб мамлакатимиздаги олий ва касбий таълим муассасаларига ўқишга кириш учун онлайн рўйхатдан ўтиш жараёни старт олди. Президентнинг ПФ-81-сон Фармонига асосан, қабул жараёни "аввал тест, сўнг танлов" тамойили асосида икки босқичда амалга оширилади.
Биринчи босқичда абитуриентлар 25 июнга қадар (шу куни ҳам) my.uzbmb.uz сайти орқали рўйхатдан ўтишлари лозим. Бунда абитуриентлар ўз танловига қараб қуйидагиларни белгилайди:
- Тест топширувчилар: фанлар мажмуаси, таълим тили ва тест топшириш ҳудуди;
- Ижодий имтиҳон топширувчилар: таълим тили, тест топшириш ҳудуди, йўналиш ва ижодий имтиҳон топшириладиган олийгоҳ.
Олийгоҳларга кириш имтиҳонлари жорий йилнинг июль-август ойларида бўлиб ўтади. Абитуриентлар тест синовида тўплаган балларини имтиҳондан кейинги куниёқ билиб олишлари мумкин.
Иккинчи босқичда тест синовлари тўлиқ якунлангандан сўнг, 15 кун давомида абитуриентлар my.uzbmb.uz сайти орқали ўзлари истаган олийгоҳ, бакалавриат йўналиши, таълим шакли ва танлов устуворлигини танлайдилар. Абитуриентнинг талабаликка тавсия этилган ёки этилмагани иккинчи босқич якунланганидан кейин бир ҳафта муддатда Билимни баҳолаш агентлигининг расмий сайтида эълон қилинади.
Техникумларда ўқиш истагида бўлган абитуриентлар олийгоҳларга қабулнинг якуний натижалари эълон қилинганидан сўнг 10 кун давомида ўзлари танлаган техникум, касб ва мутахассислик ҳамда таълим шаклини белгилашлари керак. Натижалар эса бир ҳафта муддатда расмий сайтда эълон қилинади.
Абитуриентлар ва уларнинг ота-оналарига қулайлик яратиш мақсадида Олий таълим, фан ва инновациялар вазирлиги ҳамда барча олий таълим ташкилотларида "Қабул-2026" штаби фаолият юритмоқда.
Изоҳлар мавжуд емас