Ўзбекистон, Тошкент - Batafsil.uz. Нью-Йоркдаги машҳур Oceana театри (Oceana Theater) маъмурияти Ўзбекистон халқ артисти Юлдуз Усмонованинг шу йилнинг 9 майига режалаштирилган концерти бекор қилинганини расман эълон қилди.
Театрнинг ижтимоий тармоқлардаги расмий саҳифасида тарқатилган баёнотга кўра, 2026 йил 9 май куни Брайтон-Бичда бўлиб ўтиши керак бўлган санъаткорнинг шоу-дастури ўтказилмайдиган бўлган. Маъмурият концерт бекор қилингани сабабли келтирилган ноқулайликлар учун мухлислардан узр сўраган. Баёнотда харид қилинган чипталар учун маблағларни қайтариш тартиби ҳам кўрсатиб ўтилган. Хатда айтилишича, пулларни чипта сотиб олинган жойда қайтариб олиш мумкин бўлади.
Ушбу қарор хонанданинг АҚШга ташрифи атрофида келиб чиққан кескин сиёсий можаро фонида қабул қилинган. Эслатиб ўтамиз, аввалроқ Нью-Йорк штати сиёсатчилари ва жамоат фаоллари Юлдуз Усмонованинг ўтмишдаги антисемитик чиқишларини рўкач қилиб, унинг концертига қарши кампания бошлашган эди. Улар хонанданинг АҚШ кириш визасини бекор қилишни талаб қилиб, Давлат котибига мурожаат ҳам йўллашган.
Санъаткорнинг ўзи ушбу айбловларга жавобан сиёсатчиларнинг босими остида узр сўрамоқчи эмаслигини ва Фаластинни қўллаб-қувватлашда давом этишини билдирган эди. Театр маъмурияти концертни бекор қилишнинг аниқ сабабини баёнотда кўрсатмаган бўлса-да, бунинг асосий сабаби сиёсий босимлар ва хавфсизлик масалалари билан боғлиқ экани тахмин қилинмоқда. Ҳозирча Юлдуз Усмонованинг вакиллари концерт бекор қилингани бўйича муносабат билдиришгани йўқ.
Изоҳлар мавжуд емас