Ўзбекистон, Тошкент - Batafsil.uz. Олий Мажлис палаталари ва "Юксалиш" ҳаракати ҳамкорлигида тадбиркорлар билан очиқ мулоқот ўтказилди. 16 октябрь куни бўлиб ўтган учрашувда 50 дан ортиқ тадбиркор кредит олиш, электр ва газ тармоқларига уланиш, ҚҚСни қайтариш ҳамда экспортдаги тўсиқлар каби муаммоларни кўтарди.
"Тадбиркорликни ривожлантириш, ишбилармонлик муҳитини янада яхшилаш борасидаги ислоҳотлар жараёнида парламентнинг ўрни ва роли" мавзусидаги мулоқотда сенаторлар, депутатлар, Ёшлар парламенти аъзолари ва мамлакатнинг турли ҳудудларида фаолият юритувчи тадбиркорлар иштирок этган.
Учрашувда тадбиркорликни қўллаб-қувватлаш, бизнес муҳитини яхшилаш ва бу жараёнларда парламент назоратини кучайтириш масалалари муҳокама қилинган. Ислоҳотлар самарадорлиги нафақат қонунчиликка, балки қабул қилинган қарорларнинг жойларда тўғри ижро этилишига ҳам боғлиқлиги таъкидланган.
Тадбиркорлар, шунингдек, импорт хомашёсини расмийлаштириш, маҳсулотларни сертификатлаш, экспорт харажатларини камайтириш ва ташқи бозорларга чиқишдаги тўсиқларни бартараф этиш бўйича таклифларини билдирганлар.
Учрашув якунида билдирилган таклифларни умумлаштириш, уларни Олий Мажлис палаталарининг масъул қўмиталарида кўриб чиқиш ва тадбиркорликни ривожлантиришга қаратилган аниқ чора-тадбирларни ишлаб чиқишга келишиб олинган.
Аввалроқ Президент Шавкат Мирзиёев инвесторларни "хорижлик" ва "маҳаллий" деб ажратмаслик кераклигини таъкидлаб, Ўзбекистонга сармоя киритиб, янги технологиялар олиб келаётган ва иш ўринлари яратаётган тадбиркорлар мамлакат тараққиётига ҳисса қўшишини айтганди. Давлат раҳбари бу ёндашувни "ЎЗ" фалсафаси деб атаб, уни "Ўзбекистон, ўзгариш, ўзлик ва масъулият" тушунчалари билан изоҳлаган эди.
Изоҳлар мавжуд емас