Ўзбекистон, Тошкент - Batafsil.uz. Адлия вазирлиги собиқ давлат хизматчиларини ишга қабул қилишда коррупцияга қарши ички назорат бўлинмасидан хулоса олиш бўйича идоравий ҳужжатни 2026 йил 8 июль куни 3894-рақам билан давлат рўйхатидан ўтказди. "Манфаатлар тўқнашуви тўғрисида"ги Қонун ижросини таъминлаш мақсадида қабул қилинган мазкур тартибга кўра, тегишли хулоса олинмаган ёки салбий хулоса берилган тақдирда номзодни ишга қабул қилиш тақиқланади.
Амалдаги қонунчиликка биноан, давлат органи ёки ташкилотида ишлаган ходим ишдан бўшаганидан кейин икки йил давомида ўзи назорат қилган ташкилотга ишга кирмоқчи бўлса, унинг аввалги иш жойидаги коррупцияга қарши ички назорат бўлинмасидан хулоса олиниши шарт. Янги тартибга кўра, назорат остида бўлган ташкилотнинг кадрлар бўлими собиқ ходимни ишга қабул қилишдан олдин бир иш куни ичида ички назорат бўлинмасига мурожаат юборади. Коррупцияга қарши ички назорат бўлинмаси ўрганишлар якуни бўйича уч хил (ижобий, чекловли ижобий ёки салбий) хулосадан бирини тақдим этади.
Агар номзод бўйича "чекловли ижобий" хулоса берилса, ходим ишга қабул қилинади, бироқ унга нисбатан бир қатор чеклов чоралари қўлланилади. Хусусан, у уч ой давомида аввал ўзи назорат қилган ташкилот бўйича қарорлар қабул қилишда иштирок этолмайди, манфаатлар тўқнашувига олиб келиши мумкин бўлган вазифалари қайта тақсимланади ҳамда унинг фаолияти ички назорат бўлинмаси томонидан доимий мониторинг қилиб борилади. Собиқ давлат хизматчиси берилган хулосадан норози бўлган тақдирда, юқори турувчи ташкилотга ёки Коррупцияга қарши курашиш агентлигига шикоят қилиши мумкин.
Аввалроқ Ўзбекистонда коррупциянинг аёллар ва эркакларга таъсирини ўрганишга бағишланган биринчи масштабли тадқиқот натижалари эълон қилинганди. БМТ Тараққиёт дастури, Европа Иттифоқи ва Коррупцияга қарши курашиш агентлиги кўмагида ўтказилган тадқиқотда коррупция нафақат иқтисодий, балки гендер жиҳатдан ҳам чуқур илдиз отгани аниқланган эди.
Изоҳлар мавжуд емас