Ўзбекистон, Тошкент - Batafsil.uz. Эрон АҚШ томонидан Ислом Республикасига берилган сўнгги авиазарбаларга жавобан Ҳўрмуз бўғозини қайта ёпмоқда ва Америка томонидан урилган ҳар бир объект учун иккита нишонга зарба беришга ваъда бермоқда. Мазкур баёнот АҚШ Президенти Дональд Трамп Эрон билан ўт очишни тўхтатиш келишуви якунланганини эълон қилганидан кейин янгради.
Икки ўртадаги ҳарбий ҳаракатлар Эроннинг Ҳўрмуз бўғозидан рухсатсиз ўтмоқчи бўлган учта кемага ҳужум қилиши ва бунга жавобан АҚШ ҳарбий-ҳаво кучларининг Эроннинг Бандар-Аббос яқинидаги соҳилбўйи активларига бомба ёғдириши билан қайта авж олди. Теҳрон бунга илк жавоб сифатида Яқин Шарқдаги 85 та ҳарбий нишонга зарба берганини даъво қилмоқда.
АҚШ Президенти Дональд Трамп Анқарада журналистларга берган баёнотида кенг кўламли уруш қайта алангаланмаслигини, чунки АҚШ ҳар доим Эрондан 10 баравар кучлироқ зарба беришга қодирлигини ва ихтилоф тез фурсатда якунланишини таъкидлаган.
Қайта бошланган тўқнашувлар туфайли жаҳон нефть савдоси учун энг муҳим нуқта ҳисобланган Ҳўрмуз бўғози орқали кемалар ҳаракати қарийб тўхтади. Kpler денгиз кузатув маркази маълумотларига кўра, урушгача бу ердан кунига 130 дан ортиқ кема ўтган бўлса, чоршанба куни фақат саноқли кемаларгина бўғоздан ўтишга ботинган.
Эрон расмийлари АҚШни мамлакатнинг асосий нефть маркази бўлган Харг оролини эгаллашга уриниб кўришга чақириб, бу Америка армияси учун катта йўқотишларга олиб келишидан огоҳлантирмоқда. Ушбу кескинлик билан уруш бошланганида бир неча ҳафтада тугаши тахмин қилинган Эрон можароси бешинчи ойига қадам қўйган.
Олдинроқ Эронда АҚШ билан дипломатик мулоқотни қўллаб-қувватлаётгани учун президент Масъуд Пезешкиён ва ташқи ишлар вазири Аббос Ароқчига кескин кайфиятдаги гуруҳлар томонидан жисмоний ҳужум уюштирилган эди.
Изоҳлар мавжуд емас