Ўзбекистон, Тошкент - Batafsil.uz. Сурхондарё вилояти Сариосиё тумани ҳокими ўринбосари одамларни пахта йиғим-теримига мажбурий юборишга урингани учун жаримага тортилди.
Бу ҳақда Камбағалликни қисқартириш ва бандлик вазирлиги хабар бермоқда.
Вазирлик маълумотларига кўра, ўрганиш давомида қуйидагилар аниқланган: ҳоким ўринбосари маҳалла фаолларига 5-10 кишини пахта йиғим-теримига мажбурий жалб қилиш бўйича кўрсатма берган. Бунинг учун унга 51-модда (меҳнатга мажбурлаш) билан БҲМнинг 50 баравари (20,6 миллион сўм) миқдорида жарима белгиланган.
Вазирлик фуқароларни мажбурий меҳнатга жалб қилишга йўл қўйилмаслигини ва бундай хатти-ҳаракатлар учун жавобгарлик мавжудлигини эслатди. Билдирилишича, бундай ҳолатларга йўл қўймаслик устидан назорат кучайтирилади.
Эслатиб ўтамизки, мансабдор маҳалла фаолларидан берилган топшириқни бажаришни ёки ариза ёзиб, "ортиқча гап-сўзсиз" ишдан кетишни талаб қилган. Шунингдек, майдонга киришдан бош тортганларни "виждонсизлар" деб ҳақорат қилган.
Изоҳлар мавжуд емас