Ўзбекистон, Тошкент - Batafsil.uz. Тошкент автобусларида банк картаси орқали тўлов қилишда валидатор интерфейси ўзгарди. Энди бир картани валидаторга иккинчи марта теккизганда йўловчига 2 500 сўмлик қатнов ёки 4 000 сўмлик йирик ҳажмли юк ташиш тарифини танлаш имконияти берилади.
"Тошшахартрансхизмат" маълум қилишича, ушбу ўзгариш бир банк картаси орқали бир нечта йўловчининг йўл ҳақини тўлаш жараёнида адашишнинг олдини олишга қаратилган.
Агар бир карта билан иккинчи ёки ундан кейинги йўловчилар учун тўлов амалга оширилса, валидатор экранидаги "Sayohat uchun — 2 500 so`m" банди танланиши керак. "Yuk uchun — 4 000 so`m" эса йирик ўлчамли юкни ташиш учун мўлжалланган.
Шу сабабли бир картадан бир нечта йўловчи фойдаланганда тарифни тўғри танлаш муҳим. Акс ҳолда йўловчи қатнов ҳақи ўрнига юк ташиш учун белгиланган 4 000 сўм тўловни амалга ошириб қўйиши мумкин.
Маълумот учун, 2026 йил 1 октябрдан Тошкентда жамоат транспортида электрон тўлов орқали бир марталик қатнов нархи 2 500 сўм этиб белгиланганди.
Изоҳлар мавжуд емас