Ўзбекистон, Тошкент - Batafsil.uz. 2026 йил 1–15 ноябрь кунлари Тошкент вилоятига қатновчи 18 та автобус йўналишида ўтказилган назорат тадбирларида йўл ҳақини тўламасдан ҳаракатланган йўловчиларга нисбатан 5 601 та маъмурий баённома расмийлаштирилди.
Қоидабузарликлар энг кўп 8Т, 145 ва 194-йўналишларда қайд этилган.
"Тошкент шаҳар йўловчи ташишини мониторинг ва назорат қилиш" давлат муассасаси назоратчилари томонидан ўтказилган рейдлардан мақсад жамоат транспортида йўл ҳақини ўз вақтида тўлаш маданиятини шакллантириш ва чиптасиз юриш ҳолатларининг олдини олиш бўлган.
Қоидабузарликлар энг кўп қайд этилган йўналишлардан 8Т-йўналишда — 593 та, 145-йўналишда — 585 та, 194-йўналишда — 531 та, 65-йўналишда — 517 та ва 74-йўналишда — 417 та аниқланган.
Назорат тадбирлари давомида йўловчиларга автобусга чиқиш вақтида йўл ҳақини тўлаш, транспорт ва банк карталари ҳамда бошқа нақдсиз тўлов усулларидан фойдаланиш тартиби тушунтирилган.
Аввалроқ ҳам Тошкентда олти кунда 2 мингдан ортиқ йўловчи чиптасиз юргани аниқланганди.

Изоҳлар мавжуд емас