Ўзбекистон, Тошкент - Batafsil.uz. Тошкент шаҳрининг 14 та кўчасидаги 11 та транспорт коридоридаги светофорлар ягона тизим асосида ишлай бошлади. Умумий узунлиги 77,9 километр бўлган йўлларда жорий этилган "яшил тўлқин" натижасида транспортнинг ҳаракат вақти ўртача 23 фоизга қисқаргани маълум қилинди.
Йўл ҳаракатини ташкил этиш маркази маълумотига кўра, тизим Кичик ҳалқа автомобиль йўли, Бунёдкор, Оҳангарон шоҳ кўчаси, Шота Руставели, Фарғона йўли, Кўкча Дарвоза, Аҳмад Дониш, Фаробий, Дўрмон йўли, Себзор, Янги Сергели, Махтумқули, Зиёлилар ва Боғишамол кўчаларини қамраб олган.
"Яшил тўлқин"ни жорий этиш учун янги йўллар қуриш ёки қўшимча транспорт инфратузилмаси барпо этиш талаб қилинмаган. Марказ мутахассислари йўлларда ўлчовлар ўтказиб, ҳисоб-китоблар асосида мавжуд светофор ускуналарини қайта созлаган.
Одатда ҳар бир светофор мустақил вақт жадвали асосида ишлайди. "Яшил тўлқин" тизимида эса бир-бирига яқин чорраҳалардаги сигналлар давомийлиги ва уларнинг ёниш вақти ўзаро мувофиқлаштирилади.
Натижада белгиланган тезликда ҳаракатланаётган автомобиль оқими кейинги чорраҳага етиб келганида яшил чироққа тўғри келиши кўзда тутилади. Бу ҳайдовчиларнинг ҳар бир чорраҳада тўхтаб қолиш эҳтимолини камайтиради.
Тақдим этилган маълумотларга кўра, айрим йўналишларда қуйидаги натижалар қайд этилган:
-
Шота Руставели кўчасида — 12 дақиқадан 8 дақиқага;
-
Фарғона йўлида — 13 дақиқадан 9 дақиқага;
-
Боғишамол кўчасида — 10 дақиқадан 7 дақиқага;
-
Кичик ҳалқа автомобиль йўлида — 26 дақиқадан 20 дақиқага.
Масалан, Кичик ҳалқа йўлида ҳаракат вақти 6 дақиқага камайган. Манбада келтирилган ҳисоб-китобга кўра, бу йўналишдан ҳар иш куни бориб-келадиган ҳайдовчи бир ойда тахминан 4,5 соат вақт тежаши мумкин.
Тизим светофорларни доим яшил чироқда ушлаб туришни англатмайди. Пиёдалар ва кесишувчи кўчалардаги транспорт оқими учун ҳам вақт ажратилади. Шу сабабли ҳайдовчи айрим чорраҳаларда қизил чироққа тўхташи мумкин, аммо кейинги чорраҳаларда яна мувофиқлаштирилган ҳаракат оқимига қўшилиши кўзда тутилган.
Тизимдан самарали фойдаланиш учун ҳайдовчиларга белгиланган тезликка риоя қилиш ва бир маромда ҳаракатланиш тавсия этилмоқда. Тезликни ошириш эса кейинги светофорда қизил чироққа дуч келиш эҳтимолини бартараф этмайди.
Мутахассислар тўхташлар сони камайиши кескин тормозлаш ва тезланиш ҳолатларини ҳам қисқартириши, бу эса ёқилғи сарфи ҳамда чиқинди газлар миқдорига ижобий таъсир кўрсатиши мумкинлигини таъкидламоқда.
Изоҳлар мавжуд емас