Ўзбекистон, Тошкент - Batafsil.uz. Тошкентдаги ҳаво сифатига таъсир қилаётган омиллардан бири — атмосфера инверсияси. "Ўзгидромет" маълумотига кўра, бу ҳодиса яна тахминан 10 кун давом этиши мумкин. Инверсия ифлослантирувчи моддаларнинг юқори қатламларга тарқалишини қийинлаштириб, уларнинг ер юзасига яқин ҳавода тўпланишига олиб келади.
Синоптиклар тушунтиришича, чанг ва бошқа ифлослантирувчи моддалар атмосферага доимий равишда тушиб туради. Шамол бўлмаганда уларнинг тарқалиши секинлашади, ёмғир эса чанг заррачаларининг бир қисмини ҳаводан ювиб туширади. Ёғингарчилик кузатилмаса ва шамол кучсиз бўлса, ифлослантирувчи моддалар ҳавода кўпроқ тўпланади. Атмосфера инверсияси эса уларнинг юқорига кўтарилиб тарқалишига қўшимча тўсиқ бўлади.
"Ўзгидромет" маълумотларига кўра, ҳаво ифлосланиши даражаси сутка давомида ҳам ўзгариб туради. Кундузи ҳаво исиши билан шамол одатда кучаяди, бу чангнинг тарқалишига ва ифлосланиш даражасининг нисбатан пасайишига ёрдам беради. Эрталаб ва кечқурун эса инверсия таъсирида чанг ва бошқа аралашмаларнинг тарқалиши қийинлашиб, уларнинг концентрацияси ошиши мумкин.
"Ўзгидромет" ҳаво сифатини яхшилашга қаратилган бир қатор чораларни санаб ўтди. Улар орасида автомобиль йўлларини сув сепиб намлаш, иссиқхоналарга фильтрлар ўрнатиш, ҳудудларни кўкаламзорлаштириш ва қурилиш майдонларида чанг кўтарилишининг олдини олиш бор.
Шунингдек, атроф-муҳитни ифлослантираётган иссиқхона хўжаликлари ва саноат корхоналарида рейдлар ўтказилмоқда.
Сўнгги кунларда Тошкентда ҳаво сифати кескин ёмонлашгани яна жамоатчилик эътиборига тушди. Экологлар муаммо фақат Ўзбекистон пойтахти билан чекланмаётганини, минтақавий миқёсга эга эканини таъкидламоқда. Экология ва иқлим ўзгариши миллий қўмитасида эса вазият сабаблари миллий ва халқаро кузатувлар маълумотлари асосида таҳлил қилинган.
Изоҳлар мавжуд емас