Ўзбекистон, Тошкент - Batafsil.uz. Сирдарё вилоятида ўз онасини мунтазам равишда ҳақорат қилиб, оила аъзоларининг тинчлигини бузиб келган фуқарога нисбатан қонуний чора кўрилди. Бунга ҳуқуқбузарнинг бир йил давомида шу каби ножўя ҳаракатларни бир неча бор такрорлагани ва унинг қилмишлари тўлиқ ўз исботини топгани асос қилиб олинган.
Маълум бўлишича, оилавий можаролар ўғлининг мунтазам равишда маст ҳолда уйга келиб, оила аъзоларини ҳақорат қилиши ва жанжал кўтариши оқибатида келиб чиққан. Бундан азият чеккан она ўғлига нисбатан қонуний чора кўришни сўраб, маҳалла профилактика инспектори ҳамда ҳуқуқни муҳофаза қилувчи органларга мурожаат қилган.
Суд мажлисида она фарзанди бундай ножўя хатти-ҳаракатларни бошқа такрорламаслигини айтиб, унга енгиллик беришни ҳамда жазони бошқа турдаги чора билан алмаштиришни сўраган.
Бироқ суд ҳуқуқбузарнинг бир йил давомида учинчи маротаба шу каби ҳуқуқбузарликни содир этганини инобатга олиб, Ўзбекистон Республикаси Маъмурий жавобгарлик тўғрисидаги кодекснинг 183-моддасига асосан унга 7 суткалик маъмурий қамоқ жазосини тайинлаган.
Суд жараёнида видео ва аудиотасвирлар, фотосуратлар ҳамда гувоҳларнинг кўрсатмалари орқали ҳуқуқбузарнинг қилмишлари тўлиқ исботланган.
Олдинроқ Андижонда бир гуруҳ қизлар онасини ҳақорат қилгани учун дугонасини самосуд қилганди.
Изоҳлар мавжуд емас